Toshkent davlat transport universiteti rektori Odil Abduraxmanov muassasa talabalari bilan ochiq muloqot qildi.

Ta’kidlash lozim, bu kabi muloqotlar ta’lim dargohida mavjud muammolarni o‘z vaqtida o‘rganish, talabalarning talab va takliflari bilan yaqindan tanishishda muhim ahamiyatga ega.

Muloqotda yoshlarning jamiyatda o‘z o‘rinlarini topishlariga ko‘maklashish, iqtidorlarini namoyon etishlari uchun keng imkoniyatlar yaratib berish borasida qilinayotgan ishlar haqida to‘xtalib o‘tildi. Mamlakat taraqqiyotini o‘z istiqboli bilan bog‘layotgan talaba-yoshlar hamisha e’tiborda ekanligi alohida ta’kidlandi.

Darhaqiqat, Toshkent davlat transport universitetida talabalarining o‘qib, puxta bilim olishi, ilmiy-tadqiqotlar olib borishi, o‘z sohasining malakali mutaxassisi sifatida kamol topishi uchun zarur sharoitlar yaratilgan. Muassasada bu sharoitlardan unumli foydalanib, yuqori natijalarga erishayotgan faol yoshlar talaygina.

Yuz nafardan ortiq talaba ishtirok etgan ushbu uchrashuv noan’anaviy va qiziqarli tarzda, tabiat qo‘ynida o‘tgani bilan ham boshqa muloqotlardan ajralib turdi.

Samimiy va do‘stona ruhda o‘tgan uchrashuvda iqtidorli talabalar ijrosida kuy-qo‘shiqlar ijro etildi. Tadbir so‘ngida talabalarga esdalik sovg‘alari ulashildi.

O‘zA