Tajribali murabbiylar Oʻzbekiston futbol assotsiatsiyasi huzuridagi Qoraqalpogʻiston Respublikasi bolalar-oʻsmirlar akademiyasining 2005 yilda tugʻilgan oʻquvchilari va murabbiylariga mahorat mashgʻulotlari oʻtkazdi.

– Ushbu tadbir Oʻzbekiston futbol assotsiatsiyasi (OʻFA) va “Real Madrid“ akademiyasi oʻrtasida imzolangan shartnoma asosida oʻtkazilmoqda. Bu ajoyib futbol tadbiri yurtimizda bolalar futboli rivojiga shubhasiz ijobiy taʼsir koʻrsatadi, – deydi Qoraqalpogʻiston futbol federatsiyasi birinchi vitse-prezidenti Vladimir Nazarov. – Yaqinda qoraqalpogʻistonlik yosh futbolchi Begish Quvonchboyev Oʻzbekiston delegatsiyasi safida Ispaniyaning “Real Madrid” akademiyasida boʻlib, Qirollik klubining asosiy tarkibi mashgʻulotlarida qatnashib qaytdi.

Tashrif chogʻida ispaniyalik mutaxassislar bolalar futboli murabbiylari uchun ham nazariy seminarlar tashkil etib, amaliy mashgʻulotlar oʻtkazdi.

Mehmonlar mashgʻulot darslaridan tashqari Nukus shahridagi I.Saviskiy nomidagi davlat sanʼat muzeyiga ham tashrif buyurdi.