Биринчи буғдой ортган Razoni кемаси 1 август куни Одесса портини тарк этган эди.

Бугун у "буғдой йўлаги”дан эсон-омон ўтиб олди ва Ливаннинг Триполи портига қараб бормоқда, деб хабар берди сешанба куни Ukrainian Shipping Magazine нашри.

"2 август куни соат 02:00 да Razoni иккинчи келишилган “хавфсиз ҳудуд”да эди. Энди кема Босфор бўғозидан ўтиб Ливаннинг Триполи портига қараб сузмоқда", - дейилади мазкур нашрда тарқатилган хабарда.

Razoni бортида 26 минг тонна Украина маккажўхориси бор.

Одесса портида яна 16 та кема навбат кутиб турибди.  

22 июль куни Россия, Украина, Туркия ва БМТ вакиллари Россиянинг озиқ-овқат маҳсулотлари экспортига қўйилган чекловни олиб ташлашга ва Украина буғдойини жаҳон бозорига чиқариш бўйича келишувга эришган эди.     

БМТ бош котибининг ўринбосари, Африка бўйича Иқтисодий комиссиянинг ижрочи котиби Вера Сонгвенинг таъкидлашича, “озиқ-овқат келишувининг бажарилиши” Украинанинг 23 миллион тонна  буғдойини жаҳон бозорига чиқариш имконини беради. Зеро, БМТ анчадан буён буғдой тақчиллиги туфайли дунёда озиқ-овқат инқирози юз беришидан огоҳлантириб келаётган эди.