Рақобатни ривожлантириш ва истеъмолчилар ҳуқуқларини ҳимоя қилиш қўмитаси Yandex.Go’нинг Ўзбекистонда солиқ резиденти сифатида рўйхатдан ўтмаганига изоҳ берди.

Қайд этилишича, тенг рақобатни таъминлаш нуқтаи назаридан хўжалик юритувчи субъектларнинг Ўзбекистон ҳудудида солиқ резиденти сифатида рўйхатдан ўтмагани уларнинг бозордаги устун мавқеини аниқлашга таъсир этмайди.

Ҳозирда ушбу соҳадаги тегишли норматив-ҳуқуқий ҳужжатлар ишлаб чиқилиб, амалиётга татбиқ этиш жараёнида экани айтилган. Жумладан, қўмита томонидан рақамли платформаларга нисбатан устун мавқени суиистеъмол қилишга йўл қўймаслик ва уни назорат қилишнинг аниқ механизмларини назарда тутувчи “Рақамли платформа операторининг устун мавқейи ва устун музокара кучини эътироф этиш ҳамда рақобатнинг чекланишига олиб келадиган ҳаракатларни аниқлаш тартиби тўғрисида”ги низом лойиҳаси ишлаб чиқилган. Ҳозирда вазирлик ва идоралар билан келишув жараёнида.

Шунингдек, рақамли платформа бўлган агрегаторлар томонидан кўрсатилаётган хизматлар бозорининг таҳлилий ишлари якунланган ва яқин кунларда унинг натижалари эълон қилиниши айтилган.

Март ойида қўмита Yandex компанияси Ўзбекистонда юридик шахсни ташкил этмагани масаласи ўз ваколатларига кирмаслигини, аммо бу монополияга қарши тартибга солишда қийинчиликлар туғдираётганини маълум қилган эди.

Маълумот ўрнида, март ойида ўша вақтдаги иқтисодиёт ва молия вазири Шерзод Кудбиев Yandex Go’нинг солиққа тортилиши ҳамда Ўзбекистондаги такси бозори билан боғлиқ вазиятни шарҳлар экан, Иқтисодиёт ва молия вазирлиги бозорда тенг имкониятлар яратувчи таклифлар ишлаб чиқишини маълум қилганди. Бунгача жамоатчилик фаоллари Yandex Go’нинг мамлакатда солиқ резиденти сифатида рўйхатдан ўтиши зарурлиги масаласини бир неча бор кўтарган.

6 октябрь куни Давлат солиқ қўмитаси Yandex Go хизматларини тақдим этувчи “Ridetech International B.V” компаниясидан 1 декабргача Ўзбекистонда солиқ резиденти сифатида рўйхатдан ўтиш, солиқларни тўлаш ва мижозларга фискал чек тақдим этишни талаб қилди. Қўмита қўйган талаблари бажарилмаса, Рақамли технологиялар вазирлигига Yandex Go компаниясининг Ўзбекистон ҳудудида агрегатор сифатида фойдаланиб келинаётган электрон платформадан фойдаланишини блоклаш бўйича расмий мурожаат қилишини билдирди.

Ш.Маматуропова, ЎзА