Жорий йилнинг 5-7 ноябрь кунлари Туркиянинг Истамбул шаҳрида ёшлар ўртасида спортнинг каратэ тури бўйича жаҳон чемпионати бўлиб ўтди.

Дунёнинг 118 давлатидан келган ёшлар ушбу чемпионатда иштирок этишди. Чилонзор туманидаги 281-мактаб ўқувчиси Камронбек Бозорбоев ушбу нуфузли мусобақада юртимиз шарафини ҳимоя қилиб, ўз вазн тоифасида жаҳон чемпиони деган номга мушарраф бўлиб қайтди. 

Орамизда Камронбек каби спорт мусобақаларида ғолибликни қўлга киритаётган ёшлар кўп. Ёш спортчининг ўй-кечинмалари, ғолиблик шоҳсупасига кўтарилгандаги ҳис-ҳаяжонлари ҳақида чемпион билан суҳбат асносида билиб оламиз.

– Камронбек ёшингиз неччида?

– 11 ёшдаман.

– Ғалабани қўлга киритганингизда энг аввало нимани ўйладингиз?

– Шоҳсупага чиққанимдан сўнг елкамга Ўзбекистон байроғини илиб қўйишганида жуда ҳаяжонландим. Байроқни тушириб юбормаслик учун маҳкам икки учидан сиқиб ушлаб олдим. Энг аввало дадам, онам, опа-сингилларим кўз олдимдан ўтди.

– Қувонганингиздан йиғлагандирсиз?

– Йўқ, йиғламадим. Чунки каратэ спорт тури билан етти ёшимдан шуғулланаман. Тенгдошларимдан зарба еб келган пайтларим бир-икки марта кўз ёш тўкканимда дадам, “йигит кишига йиғлаш ярашмайди, ҳеч қачон кўз ёш тўкмагин”, деб  насиҳат қилган. Шундан буён ҳечам йиғламайман.

– Татамида жанг қандай ўтди?

– Мен 40 килограмм вазн тоифаси бўйича иштирок этдим. Бешта давлатдан келган болалар билан майдонда беллашдим. Финалда туркиялик ҳамда индонезиялик спортчи билан куч синашдим. Рақибларимни енгиб, жаҳон чемпиони бўлдим.

– Каратэда кўпроқ нималарга эътибор берилади?

– Шотокан каратэда қўл ҳам, оёқ ҳам ишлатилади. Аммо рақибнинг белбоғидан пастга тепиш мумкин эмас. Агар белдан пастга тепилса, очколар олиб ташланади.

– Вақтингизнинг кўп қисмини машғулотда ўтказасиз. Мактабдаги дарсларингизга, китоб ўқишга имкон топасизми?

– Каратэдан ташқари математика ва инглиз тили тўгаракларига бораман. Вақтим тиғизлиги сабабли анча қийналиб қолдим. Спортчининг билаги кучга тўлган бўлишидан ташқари ақли ҳам билимга тўла бўлиши керак. Устозим Аҳмаджон ака Абдуллаев рақибимни фақат куч билан эмас, ақл билан енгишни ўргатган. Шунинг учун кўп китоб ўқишга, спортчиларнинг ҳаётларини ўрганишга, ютуқлари нимада-ю камчилик ва хатоларини кузатиб боришга ҳаракат қиламан.

– Кўчада тенгдошларингиз билан урушадиган вазият бўлиб қолса нима қиласиз?

– Мураббийим энг жаҳлга бериладиган холатларда ҳам ўзимизни қўлга олишни, спортчи кучини кўчада эмас, татамида кўрсатишини уқтиради. Аввало шундай вазиятларни келтириб чиқармасликка ҳаракат қиламан. Мабодо ўртоқларим тортишиб қолишсаям жанжал ёқалашишгача бормайди. Ўзимиз келишиб оламиз.

– Айрим ўғил болалар орасида мактабга ўткир тиғли жисмлар олиб борадиганлар бор. Уларга муносабатингиз қандай?

– Ҳозир мактабларда бундай болаларга жиддий қараляпти. Устозлар ўғил болаларнинг сумка ҳамда чўнтакларида ўзлари билан нима олиб юришганини текшириб туришади. Ўртоқларим орасида бундай болалар умуман йўқ. Ҳаммаси тил ўрганиш ёки спорт билан машғул. Дадам кўпинча ўзига ишонмаган йигит ёнида тиғли қуроли билан юради, дейди. Ўткир тиғли жисмлар олиб юрадиган болалар нафақат ўзининг кучи балки сўзигаям жавоб бераолмайди. Бундай болаларни ёқламайман. Тўғри, йигитлар ўртасида ҳар хил вазиятлар бўлади, кимдир ким биландир баҳслашиб, муросасизлик келиб чиқиши мумкин. Шундай пайтларда бир оғиз узр сўраш билан ҳар қандай муаммога ечим топса бўлади.

– Ҳозир кўпгина ёшлар сал нарсага қизишиб, асабийлашадиган бўлиб қолишган. Уларга қандай маслаҳат берасиз?

– Кўпроқ спорт билан шуғулланишни маслаҳат бераман. Спорт ҳар қандай одамнинг ичидаги ёмон ҳиссиётларини жиловлашига ёрдам беради. Ўзим ҳам 7-8 ёшимда жуда шўх бўлганман. Аммо каратэ сабаб асаб тизимини бошқаришни, ўзимни оғир-вазмин тутишни ўргандим.

Камронбек Бозорбоевнинг Истамбул татамисидаги жанглари ҳамда юртимизга қайтиши муносабати билан ўтказилган тадбирдан олинган  видеолавҳани хавола этамиз.

<iframe width="1280" height="720" src="https://www.youtube.com/embed/DU-BFJusQBU" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture" allowfullscreen></iframe>

Нигора Раҳмонова,

Ёқуб Мелибоев (видео), ЎзА