Пойтахтимизда Қурилиш ва уй-жой коммунал хўжалиги вазирлиги томонидан "Янги Ўзбекистонда қурилиш соҳаси: кеча, бугун ва эртага" мавзусида матбуот анжумани бўлиб ўтди.

Унда мамлакатимизда қурилиш соҳасига қаратилаётган эътибор, тадбиркорларни қўллаб-қувватлаш ва уларнинг фаолиятини мувофиқлаштириш йўналишларида амалга оширилаётган ишларга тўхталиб ўтилди.  

– Мамлакатимиз инфратузилмасини ривожлантириш, шаҳарсозлик соҳасини такомиллаштиришга бугун давлатимиз раҳбари томонидан алоҳида эътибор қаратиб келинмоқда, – деди Қурилиш ва уй-жой коммунал хўжалиги соҳасида назорат қилиш инспекцияси бошлиғи Козим Тўлаганов. – Таъкидлаш лозимки, бунда давлат назорати жуда муҳим аҳамият касб этади. Мазкур йўналишда Қурилиш ва уй-жой коммунал хўжалиги вазирлиги билан ҳамкорликда қатор ишлар амалга оширилмоқда. Соҳада шаффофликни ошириш мақсадида рақамли технологиялар ривожлантирилмоқда. Бу ўз-ўзидан рақобат муҳитини кучайтиришга хизмат қилмоқда.  

– Бугунги кунда институт томонидан техник меъёрлаш, халқаро нормаларни уйғунлаштириш, илмий-тадқиқотлар ва инновациялар, стандартлаштириш, тизимлаштириш ҳамда атамалар, зилзилабардош қурилишга доир меъёрий ҳужжатларни такомиллаштириш, ахборот технологиялари, энергоаудит ва энергосамарадорлик сингари йўналишларда устувор вазифалар ижроси таъминлаб келинмоқда, – деди Техник меъёрлаш ва стандартлаштириш илмий-тадқиқот институти директори Шерзод Содиқов. – Техник меъёрлаш ва стандартлаштириш институти нафақат Осиё давлатлари, балки соҳада илғор нуфузга эга бўлган Европа мамлакатлари, хусусан, Франция, Италия, АҚШ, Япония, Хитой, Корея Республикаси билан ҳамкорлик алоқаларини мустаҳкам ўрната олди.  

Институт шунингдек, «Қурилиш ресурслари миллий классификатори» электрон платформасини юритади, ташкил этилган комплекс синов лабораториясида эса ҳозирги кунда 200 хилдан ортиқ синовлар мавжуд.  

Қурилиш ва уй-жой коммунал хўжалиги, шунингдек, қурилиш ва шаҳарсозлик соҳасидаги қонунчилик ҳужжатлари хорижий давлатлар тажрибасидан келиб чиқиб, халқаро стандартлар билан уйғунлаштирилган ҳолда такомиллаштириб борилмоқда. 

 Жумладан, Вазирлар Маҳкамасининг 2023 йил 23 ноябрда «Шаҳарсозлик фаолиятида рухсат бериш тартиб-таомилларини такомиллаштиришга қаратилган Ўзбекистон Республикаси Ҳукуматининг айрим қарорларига ўзгартириш ва қўшимчалар киритиш, шунингдек, баъзиларини ўз кучини йўқотган деб ҳисоблаш тўғрисида»ги қарори қабул қилинди.  

Ушбу қарор билан лойиҳалаштириш ва қурилишнинг айрим фаолият турларини лицензиялашда ходимларнинг маълумоти, сони ва иш стажига бўлган талаблар кучайтирилди. Шаҳарсозлик ҳужжатларини экспертизадан ўтказувчи юридик шахсларни аккредитация қилишда олий маълумотга эга мутахассисларнинг асосий иш жойи бўйича фаолият юритиш талаби белгиланди. Эксперт хулосаси «Шаффоф қурилиш» миллий ахборот тизимига мажбурий киритиладиган бўлди.  

Тадбир давомида соҳада амалга оширилган ишлар ҳақида ҳам сўз борди. Таъкидланганидек, республика бўйича жами қурилиш ишлари ҳажми 2020 йилда 88 трлн., 2021 йилда 108 трлн. , 2022 йилда 131 трлн., 2023 йилда 139 трлн. ва 2024 йилнинг биринчи чорагида 32 трлн. сўмни ташкил этган.  

2024 йилнинг 1 чорагида жами 33 та, шундан 1 та шаҳар, 10 та шаҳарчаларнинг бош режалари ва 22 та қишлоқ аҳоли пунктларининг шаҳарсозлик жиҳатдан ривожлантириш схемалари ишлаб чиқилиб, Вазирлар Маҳкамаси ҳузуридаги Республика архитектура-шаҳарсозлик кенгаши йиғилиш муҳокамасига киритилди ҳамда ўрнатилган тартибда Вазирлар Маҳкамасининг тегишли баёнлари билан тасдиқланди.  

Жорий йилнинг биринчи чорагида Ижтимоий ишлаб чиқариш ва инфратузилмани ривожлантириш дастури доирасида 100 фоиз ижтимоий соҳа объектларнинг лойиҳа-смета ҳужжатлари ишлаб чиқилиб, экспертизага тақдим этилди. Шу билан бирга «Ташаббусли бюджет» дастури доирасида 3 865 та объектдан 2 983 тасининг лойиҳа-смета ҳужжатлари ишлаб чиқилиб, экспертиза кўригига тақдим этилди.  

2024 йил учун Ижтимоий ишлаб чиқариш ва инфратузилмани ривожлантириш дастурига киритилиши белгиланган 840 та янгидан бошланувчи объектлардан барчасининг лойиҳа-смета ҳужжатлари ишлаб чиқилган ва экспертиза кўригига тақдим этилди.  

Анжуманда қайд этилишича, «Шаффоф қурилиш» порталининг tender.mc.uz электрон платформаси орқали 2024 йилнинг биринчи чорагида 1,46 мингта объектга лойиҳа ва пудрат ташкилотларини аниқлаш бўйича онлайн электрон тендер савдолари ўтказилган. Шу билан бирга тизим орқали 2024 йилнинг биринчи чорагида 2,8 мингдан ортиқ объект лойиҳаси экспертизадан ўтказилди. Натижада 1,2 трлн. сўм маблағ лойиҳаларнинг смета қисмидан иқтисод қилинди.  

<iframe width="560" height="315" src="https://www.youtube.com/embed/v4bhNw95rsc?si=i6UuExaNFPZI0GE1" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Шаҳноза Маматуропова,  

ЎзА