Наманган шаҳрида янги барпо этилган “IT Park”да вилоятга жалб қилинган хорижий ва маҳаллий “IT”га ихтисослашган компания вакиллари иштирокида матбуот анжумани ташкил этилди. Унда бир қатор ахборот коммуникация технологияларига ихтисослашган етакчи компанияларнинг лойиҳалари тақдимоти бўлиб ўтди.

Вилоят ҳокимининг рақамлаштириш масалалари бўйича маслаҳатчиси Бахтиёр Охунбобоевнинг таъкидлашича, 2024 йил 1 январь ҳолатига кўра, Наманганда “IT Park” резидентлари сони 30 тани ташкил қилиб, ҳозирга қадар 36 компания резидент мақомини олиб, улар сони 66 тага етди. Шу йилнинг апрель ойидан фаолиятини бошлаган Наманган “IT Рark” биносига мамлакатимиздаги етакчи экспортёр АКТ компаниялари бепул ижара ҳуқуқи асосида жойлаштирилди.  

[gallery-18450]

– Бизнинг “Синергия” корпорацияси Наманганда рақамли касблар техникумини ташкил этди. Мазкур техникумда ҳозирда долзарб соҳалардан саналган “IT” соҳасига ихтисослашган касбларни ёшларга ўргатиш мақсад қилинган, – дейди Россия Федерациясининг “Синергия” университети “Минтақавий техникумлар” лойиҳасини ривожлантириш бўйича директори Александр Тетерюк. – Тармоқ ва тизим администратори, веб дастурлаш, ахборот хавфсизлиги ана шулар жумласидан. Техникумда ўқиш икки йил бўлиб, таълим жараёнлари Тўрақўрғон агротехнологиялар техникумига қарашли ўқув биноларида олиб борилади. Битирувчи ёшларга икки давлат дипломи топширилади. Қолаверса, Ўзбекистон Республикаси ва Россия Федерацияси дипломлари, шунингдек, юртингиздаги олийгоҳлар ҳамда бизнинг университетга иккинчи босқичдан ўқиш имконияти яратилади.  

– “RealSoft” компанияси рақамли технологиялар бозорида ўз ўрни ва нуфузига эга бўлиб, биз ҳозирда еттита давлат ҳамда юртимизнинг Бухоро, Андижон, Тошкент каби бешта вилоятида, жумладан, Наманганда ҳам филиалимиз мавжуд, – дейди “Realsoft Namangan” МЧЖ раҳбари Исломжон Икромов. – Компаниямиз томонидан ишлаб чиқилган “Oson test” – осон, тез ва қулай имтиҳон яратиш ва бошқариш тизимини жорий этиш устида иш олиб боряпмиз. Мазкур янги тизим осон имтиҳон яратиш, қайта фойдаланиш ва натижаларни таҳлил қилиш, маълумотларни импорт, экспорт қилиш имкониятларини берувчи бепул платформа ҳисобланади. У веб, мобил ва телеграм бот (офлайн) кўринишда ишлаш имкониятига эга. Дастур мукаммал якунлангач таълим муассасаларига экспорт қилинади.  

Матбуот анжуманида оммавий ахборот воситалари вакиллари Наманган “IT Рark”да яратилган шарт-шароитлар билан яқиндан танишди ва ўзларини қизиқтирган саволларга жавоб олди.  

Оқилхон Дадабоев, Хотам Мамадалиев (сурат), ЎзА.