Хорватиянинг Загреб шаҳрида ўтаётган "Grand Chess Tour" тизимидаги навбатдаги мусобақа – “Rapid & Blitz Croatia” турнирининг 3 та тур ўйинлари ортда қолди.

Кеча ўтказилган 3 та турнинг 2 тасида дуранг, 1 тасида мағлубиятга учраган Нодирбек Абдусатторов 2 очко билан турнирда қатнашаётган дунёнинг энг кучли шахматчилари рўйхатида қўшимча кўрсаткичлар эвазига 8-ўринда бормоқда.

“Rapid & Blitz Croatia” турнирининг 1-турида Нодирбек Абдусатторов қора доналарда нидерландиялик Аниш Гирига рўбарў келди ва мағлубиятга учради.

2-турда Абдусатторов оқ доналарда ҳиндистонлик Рамешбабу Праггнанандха билан, 3-турда ҳам қора доналарда хорватиялик Иван Сарич билан очколарни бўлишиб олди.

Бугун, 3 июль куни нуфузли мусобақанинг 4, 5 ва 6-тур ўйинлари ташкил этилади. Нодирбек 4-турда азалий рақибларидан бири, ҳиндистонлик Гукеш Доммаражу билан оқ доналарда куч синашса, 5-турда қора доналарда Уэсли Со, 6-турда оқ доналарда Фабиано Каруана қаршилигини енгишга интилади.

Мукофот жамғармаси 175 минг АҚШ долларидан иборат турнирнинг ортда қолган ўйинлари сарҳисобига кўра, Магнус Карлсен, Ян-Кшиштоф Дуда, Гукеш Доммаражу, Уэсли Со 4 очко жамғариб, етакчилик қилмоқда. Кейинги қаторларни банд этган Аниш Гири ва Иван Сарич ҳисобида 3 очкодан мавжуд. Фабиано Каруана, Нодирбек Абдусатторов, Алиреза Фирузжа ҳамда Рамешбабу Праггнанандха 2 очко билан баҳслардаги иштирокини давом эттирмоқда.

Эслатиб ўтамиз, 6 июлга қадар давом этадиган турнирда ғолибликка эришган шахматчи 40 минг АҚШ долларига, 2-ўрин соҳиби 30 минг АҚШ долларига эга чиқади. Шунингдек, 10-поғонагача бўлган ўринлардан жой олган шахматчилар белгиланган миқдордаги мукофот пулларини қўлга киритади.

Тўлқин Рўзиев,

ЎзА