Пойтахтимиздаги Ёшлар ижод саройида «Ўзбеккино» Миллий агентлиги буюртмаси билан режиссёр Аюб Шаҳобиддинов томонидан суратга олинган «Рангсиз тушлар» бадиий фильмининг премьераси бўлиб ўтди.

Тадбирда «Ўзбеккино» МА бош директори биринчи ўринбосари Шуҳрат Ризаев ҳамда «Ўзбекфильм» ДУК директори Фотиҳ Жалоловлар бугунги кунда ўзбек киносида юз бераётган ўзгаришлар, салмоқли фильмлар яратилаётгани ҳақида гапирди. Ижодий гуруҳни премьера билан табриклади. Бугунги кино ихлосмандларига «Рангсиз тушлар» каби фильмлар кераклиги айтилди.

– Фильм сценарийси  7-8 йил олдин ёзилган, – дейди режиссёр Аюб Шаҳобиддинов.– Жамоа билан фильм устида икки йил ишладик. Шу кунга қадар турли танлов ва фестивалларда ғолибликни қўлга киритди. Айни кунларда бу фильм  Германия ва Голландияда танловларда иштирок этиш учун йўлланма олган.

«Рангсиз тушлар» картинаси узоқ муддат маҳкумликда бўлган ва озодликка чиқиб жамиятда ўз ўрнини топишга интилган аёл қисмати ҳақида.

Картинада ролларни Феруза Саидова, Карим Мирҳодиев, Шоҳида Исмоилова, Лола Элтоева, Дониёр Ҳафизов, Бекзод Абдумуҳитов ва Асал Абдуллаевалар ижро этишган. 

Сценарий муаллифи Умид Ҳамдамов, постановкачи оператор Азизбек Арзиқулов, рассом Шамшод Иброҳимов, композитор Убайдулло Каримов.

Фильм кишини ён-атрофга теран нигоҳ билан қарашга, тўғри йўлда ёки аксинча эканлигини текшириб олишга чорлайди. Бош қаҳрамон Кашмира образи орқали меҳр-оқибат, инсонийлик, шарқона қарашлар очиб берилган, жамиятдаги ҳолат рўй-рост кўрсатилган.

Эслатиб ўтамиз: 25 декабрдан фильмни юртимиздаги барча кинотеатрларда томоша қилиш мумкин.

Д. Маматова, ЎзА