«Рангсиз тушлар» фильми Италиянинг “Lucania” кинофестивалида иштирок этади
Аюб Шаҳобиддинов томонидан суратга олинган «Рангсиз тушлар» фильми Италиянинг “Lucania” кино фестивалида иштирок этиш учун таклиф олди.
Аюб Шаҳобиддинов томонидан суратга олинган «Рангсиз тушлар» фильми Италиянинг “Lucania” кино фестивалида иштирок этиш учун таклиф олди.
Бу ҳақда «Ўзбеккино» миллий агентлиги хабар бермоқда.
18 йилдан буён ўтказилаётган “Lucania Film Festival” бутун дунёдан режиссёрларнинг муаллифлик фильмларини намойиш этадиган нуфузли халқаро кинофестиваль ҳисобланади. Фестивалнинг бу йилги мавсуми 7-9 август кунлари Италияда бўлиб ўтиши кутилмоқда.
Аюб Шаҳобиддиновнинг «Рангсиз тушлар» драмаси «Қозон мусулмон кинофильмлари» халқаро фестивали ва Ереваннинг "Fresco" маънавий-ахлоқий фильмлар халқаро кинофестивалларида иштирок этиш учун ҳам таклиф олган.
Киноасарда жазо муддатини ўтаб келган шахсларга нисбатан жамиятда ноўрин муносабатнинг шаклланиши, «одамлар нима дейди» каби қарашлар ортидан пайдо бўладиган чуқур ижтимоий муаммолар кўтарилган. Фильмда бош қаҳрамон ролини Феруза Саидова ижро этган. Шунингдек, киноасарда Карим Мирҳодиев, Шоҳида Исмоилова, Бекзод Абдумуҳитов ва Анвар Назаровлар суратга тушган.
Маълумот ўрнида, фильмнинг ёпиқ намойиши «Ўзбеккино» миллий агентлиги Медиа клубида жорий йилнинг июнь ойида ўтказилган ва журналистлар, блогерлар ҳамда жамоатчилик фаоллари томонидан илиқ кутиб олинган эди.