Эрон МАГАТЭ текширувини инкор этмайди, бироқ айрим инспекторлар фаолиятини Теҳрон ишончини суиистеъмол қилишга қаратса, у ҳолда улар мамлакатдан чиқариб юборилади, деди Эрон Ислом Республикаси Президенти Иброҳим Раисий.

– Эрон МАГАТЭ текширувини бутунлай рад этаётгани йўқ, – деди Раисий. – Биз бу ташкилот билан яхши ҳамкорлик қиляпмиз. Билдирилган ишончни суиистеъмол қилган ходимларга нисбатан эса алоҳида чора кўрамиз. Айрим инпекторлар ишончимизни оқламаса, мамлакатдан чиқариб юборилади. Шубҳа туғдирмаган мутахассислар эса фаолиятини давом эттираверади.

Аввалроқ МАГАТЭ Эрондаги атом объектларида текширув олиб бораётган агентликнинг бир неча ходимига берилган аккредитация қайтариб олинганини маълум қилган эди. Эрон Ташқи ишлар вазирлиги расмий вакили Носир Қонуний баёнот беришича, Теҳрон Ядро қуролини тарқатмаслик шартномаси кафолати ҳақидаги битимнинг 9-бандига асосланиб, МАГАТЭ инспекторларига берилган аккредитацияни қайтариб олиш ҳуқуқига эга.