Қазақстанның Астана қаласында Орталық Азия – Қытай (С5+1) азаматтық авиация саласындағы ынтымақтастық жөніндегі жұмыс тобының екінші конференциясы өтті.

Көлік министрлігінің мәліметінше, конференция аясында Өзбекстан делегациясы мен Қытай азаматтық авиация әкімшілігі арасында келіссөздер жүргізілді.

«Келіссөз барысында екі ел арасындағы келісілген әуе рейстері санын 130-ға дейін көбейту, өзбекстандық әуе тасымалдаушыларға Қытайдың жаңа қалаларына ұшуға рұқсат беру, сондай-ақ Қытайға жолаушылар мен жүк тасымалдау құқығына ие болатын өзбекстандық әуе компанияларының санын 8-ге жеткізу мәселелері талқыланды», делінген хабарламада.

Келіссөздер нәтижесінде тиісті құжатқа қол қойылды. Бұл құжат Қытай тарапы өзінің ішкі келісу рәсімдерін аяқтаған соң күшіне енуі жоспарланған.