Қытайда пандемия басталғаннан бері күнделікті COVID-19 жағдайының рекордтық саны тіркелгені анықталды.

ВВС-дің хабарлауынша, 23 қарашада коронавирус диагнозы қойылған 31 444 науқастар тіркелген. Олардың 3927-сінде ауру белгілері байқалса, 27517-де жоқ.

Сондай-ақ бір адам қайтыс болып, пандемия басталғаннан бері олардың саны 5232-ге жеткен.

Ел астанасы Бейжіңде сәрсенбіде 509 жаңа COVID-19 жағдайы тіркелген.

Сарапшылардың пікірінше, Қытайдың тұрақты карантиннен шыға алмауының бір себебі қытайлық вакциналардың тиімділігінің төмендігі болуы мүмкін.

Қытай Коммунистік партиясының Саяси бюросы коронавирустың таралуына қарсы 20 шарадан тұратын бағдарлама қабылдағанымен, ауруды ауыздықтау мүмкін болмай тұр. Қытай коронавируспен байсалды күрес аясында қалалар мен ауылдарды, ірі өнеркәсіптік аймақтарды, зауыттар мен фабрикаларды, супермаркет және саябақтарды карантинге жабу тәжірибесін қолдануда. Бұл әлеуметтік толқуларды күшейтіп, ел экономикасына әсер етуде.