Сырдарияда азық-түлік қауіпсіздігін қамтамасыз ету және аграрлық саладағы ғылыми зерттеулерді жаңа деңгейге көтеру мақсатында Қытай – Өзбекстан халықаралық бірлескен зертханасы іске қосылды.

Бұл орталық азық-түлік өнімдерінің қауіпсіздігі, топырақ құнарлылығы, биотехнология және селекция бағыттарында ғылыми ізденістер жүргізуге қызмет етеді.

Жоғары білім, ғылым және инновациялар министрі Қунғиратбой Шарипов Гүлістан мемлекеттік университетіне жасаған жұмыс сапары барысында зертхананың символикалық ашылу салтанатына қатысты. 

Іс-шараға Қытайдың беделді ғалымдары – Shandong Baolai Leelai Bio-Tech Group профессоры Жинпенг Юань, Шандун ғылымдар академиясының Тест-талдау орталығының ғалымдары Лихон Ван және Фан Чуаньфан да қатысты. 

Кездесуде білім, ғылым және инновациялар саласындағы стратегиялық әріптестік мәселелері, алдағы уақытта жүзеге асырылатын бірқатар ғылыми жобалар талқыланды. Сондай-ақ, Гүлістан мемлекеттік университетінде қытай тілі бойынша бакалавриат бағытын ашу жоспары да жарияланды.

Сапар соңында «Тест-аналитикалық талдау» халықаралық зертханасы жобасы таныстырылып, оның құрылысы таяу күндері басталатыны белгілі болды. Бұл бастама екі ел арасындағы аграрлық саладағы ғылыми-инновациялық ынтымақтастықты нығайтуда маңызды қадам болмақ.

– Зертхана заманауи құрал-жабдықтар мен озық технологиялар негізінде азық-түлік қауіпсіздігін қамтамасыз етуге, топырақ құнарлылығын бағалауға, биотехнология мен селекция салаларында жаңа зерттеулер жүргізуге мүмкіндік береді, – дейді Гүлістан мемлекеттік университеті жанындағы Агробиотехнология және биохимия ғылыми-зерттеу институтының директоры, биология ғылымдарының докторы, профессор Хабибжон Кушиев.

Ең бастысы, Сырдарияда іске қосылған бұл зертхана тек заманауи ғылыми зерттеу алаңы ғана емес, сондай-ақ екі ел ғалымдарының ғылыми тәжірибе алмасатын, жаңа идеяларды тәжірибеге енгізетін орталығына айналмақ. Бұл әріптестік болашақта азық-түлік қауіпсіздігі мен ауыл шаруашылығын тұрақты дамытуға лайықты үлес қосады деп күтілуде.