Қытай мен Өзбекстан арасында контейнерлік жүк тасымалына маманданған UTK International Logistics Co. Ltd атты бірлескен кәсіпорын құрылды.

Көлік министрлігінің хабарлауынша, жаңа компанияның ашылуына арналған салтанатты рәсім Бейжің қаласында, «Узтемириулконтейнер» АҚ мен Қытайдың Xinjiang Union of Railway International Logistics Co. Ltd компаниялары арасындағы әріптестік негізінде өтті.

Іс-шарада аталған кәсіпорынның Қытай мен Өзбекстан арасындағы көлік-логистика саласындағы ынтымақтастықты нығайтуда стратегиялық маңызы зор екені ерекше атап өтілген және тараптар бұл компанияның аймақтық жүк тасымалын кеңейту ісінде маңызды буынға айналатынына сенім білдіріп отыр.

UTK International Logistics Co. Ltd кеңсесі Қытайдың Үрімжі қаласында орналасады. Компанияның негізгі қызмет бағыттарына жүк ағындарын біріктіру және тиімді консолидациялау, Қытай тарапынан жүк тасымалына субсидия тарту, Қытай – Орталық Азия бағытындағы мультимодальды тасымалдарды дамыту кіреді.

Ұйымдастыру жұмыстары толық аяқталған соң, кәсіпорын Қытай – Қырғызстан – Өзбекстан бағыты бойынша алғашқы контейнер пойыздарын жөнелтуге кіріседі деп жоспарланған.