Қытайлық ғалымдар қартаю процесін баяулататын Q10 коэнзимін синтездейтін жаңа күріш сортын әзірледі. Адам ағзасында бұл коэнзимнің табиғи өндірісі 20 жастан кейін төмендей бастайды.

Q10 коэнзимі – адам жасушаларындағы энергия алмасудың негізгі құрамдас бөлігі. Ол жүрек бұлшықетін антиоксиданттық қорғаныспен қамтамасыз етеді, тотығу процестерін баяулатады, жүрек бұлшықеттерінің тонусын арттырады және тері қартаюын баяулатуға көмектеседі. Сонымен қатар, бұл элемент бұлшықеттердің құрысуы мен ауырсыну синдромдарының алдын алуға ықпал етеді.

Көптеген спортшылар Q10 коэнзимін тамақ рационына қосады, себебі ол бұлшықет талшықтарын нығайтып, жаттығудан кейін күш-қуатты қалпына келтіруге көмектеседі. Алайда, 20 жастан кейін ағзада бұл заттың табиғи синтезі айтарлықтай төмендейді. Осы себепті ғалымдар оны дәстүрлі дәнді дақылдардан алудың жолын тапты.

Тәжірибе барысында зерттеушілер 67 тұқымдасқа жататын 134 түрлі өсімдік үлгілерін жинап, коэнзимнің тек жабық тұқымды өсімдіктерге тән екенін анықтады. Гүлді және асқабақ тұқымдастарына жататын өсімдіктер негізінен Q9 коэнзимін өндіреді, ал Қытайдың басты ұлттық дақылы – күріш адамға аса қажет Q10 коэнзиміне бай екені белгілі болды.

Қытай ғалымдары гендік инженерия технологиясын пайдалана отырып, бұл құнды затты синтездейтін күріш сортын жасады. Зерттеу нәтижесінде өсімдік жапырақтарында коэнзимнің 75 пайызға дейінгі мөлшері жинақталғаны, ал күріш дәндерінде бір граммда 5 микрограмға дейін коэнзим бар екені анықталды. Бұл өзгеріс күріштің өнімділігіне кері әсерін тигізген жоқ.

Қытай Ғылым академиясы жаңа күріш сортын адам ағзасына қажет Q10 коэнзимінің ең маңызды көзі ретінде қарастырып отыр.

Ғалымдар бұл жаңалықты медицина, спорт және тамақтану салаларында кеңінен қолдануға болатынын айтады. Алдағы уақытта жаңа күріш сортының адам ағзасына әсерін тереңірек зерттеу, оны ауыл шаруашылығында жаппай өндіріске енгізу көзделген.