Қырғызстан президенті Садыр Жапаров темекі өнімдері мен никотин заттарының зиянды әсерінен халықтың денсаулығын қорғау шараларын күшейтуге бағытталған заңға қол қойды.

Бұл заң 2024 жылдың 23 қазанында Қырғызстан Жоғарғы Кеңесі тарапынан қабылданған және ел аумағына электронды темекілерді әкелуге, сатуға және пайдалануға тыйым салады. 

Заңның негізгі мақсаты — никотин мен темекі аэрозолдарының халыққа теріс әсерін азайту және электронды темекілердің заңсыз айналымына қарсы күреске бағытталған.

Құжатқа сәйкес, электронды темекіні пайдаланғаны үшін жеке тұлғаларға 10 мың сом (1 млн 484 мың сум), заңды тұлғаларға 60 мың сом (8 млн 905 мың сум) айыппұл қарастырылған.

Оны сату айыппұлы одан да қымбат. Бұл үшін жеке тұлғаларға 20 мың сом (шамамен 3 млн сум), заңды тұлғаларға 65 мың сом (9 млн 647 мың сум) айыппұл белгіленген.

Электронды темекіні заңсыз әкелу Қылмыстық кодекс шеңберінде қаралмақ. Егер әкелінген өнім мөлшері едәуір көп болса, айыптылар екі айдан бір жылға дейін мәжбүрлі еңбекпен 100-120 мың сом (14-17 млн сум) айыппұл арқалауы, сонымен қатар, бір жылға дейін белгілі бір қызметпен айналысу құқығынан айрылуы мүмкін.

Өнім көлемі өте үлкен жағдайда, айыппұл мөлшері 150-200 мың сом (22-29 млн сум) болып, бір-екі жылға дейін бас бостандығынан айыру жазасы қолданылуы мүмкін.

Заң 2025 жылдың 1 шілдесінен бастап күшіне енеді.