Бугунги кунда мамлакатимизда қуёш панеллари ўрнатганлик учун берилган бир қатор қулайликлар ва солиқ имтиёзлари туфайли барча жойларда бўлгани каби Бухорода ҳам аҳоли хонадонлари, тадбиркорлик субъектлари ҳамда маъмурий бинолар томига қуёш панелларини ўрнатиш ишлари қизғин тус олган.

Вилоятдаги жами 4 200 дан ортиқ хонадонда қуёш панеллари ўрнатилиб, уй эгалари эҳтиёжидан ортган электр энергиясини тизимга сотиш орқали даромад олмоқда.

2023 йил 1 апрелдан “Қуёшли хонадон” дастури доирасида хонадонига қуёш панелларини ўрнатган жисмоний шахсларга қуёш панели орқали ишлаб чиқарилган ва ягона электр энергетика тизимига узатилган электр энергиясининг ҳар бир киловатт соати учун 1000 сўмдан субсидия ажратилиши белгиланган. 

Маҳалла солиқ инспекторининг маслаҳати ва ушбу йўналишда берилган имтиёздан вақтида хабар топган қоровулбозорлик Азиз Ортиқов ҳам ўзига тегишли бўлган 8 сотих майдонда 100 квт соат қувватга эга бўлган қуёш панелларини ўрнатиб даромад топмоқда. 

Шу ерлик яна бир фуқаро Илҳом Муҳиддинов ҳам хонадонига 50 квт соат қувватга эга бўлган қуёш панелларини ўрнатиш орқали ўз хонадонини узлуксиз электр токи билан таъминлаяпти ҳамда ортганини сотяпти.

Умумий қуввати 100 кВт гача бўлган қайта тикланувчи энергия манбалари қурилмаларидан фойдаланган ҳолда умумий тармоққа электр энергиясини реализация қилишдан олинган фойда 0 фоиз ставкада солиққа тортилади. 

Ставка қайта тикланувчи энергия манбалари қурилмалари ишга туширилган ойдан бошлаб 3 йил давомида қўлланилади. Қуёш панеллари қувватининг камида 25 фоиз миқдорида электр энергиясини тўплаш тизими билан қуёш панеллари ўрнатилганда бу панеллар ишга туширилган ойдан бошлаб 10 йил давомида қўлланилади.

Шунингдек, қуёш панелларини ўрнатган юртдошларимиз ер солиғи ва мол-мулк солиғидан ҳам белгиланган тартибда имтиёздан фойдаланмоқда.

Зариф Комилов, ЎзА мухбири.