Фармон ва ижро
Пойтахтимиздаги “International Hotel Tashkent” меҳмонхонасида қайта тикланувчи энергия манбаларини кенг жорий этиш орқали Ўзбекистонда “яшил” энергетикани ривожлантиришга бағишланган анжуман бўлиб ўтди.
“Ўзэлтехсаноат” уюшмаси ва “Huawei Tech Investment Tashkent” МЧЖ ҳамкорлигида ташкил этилган ушбу тадбир Ўзбекистон Республикаси Президентининг 2022 йил 9 сентябрдаги “Энергия тежовчи технологияларни жорий қилиш ва кичик қувватли қайта тикланувчи энергия манбаларини ривожлантириш бўйича қўшимча чора-тадбирлари тўғрисида”ги фармони ижросини таъминлашга қаратилган.
Анжуманда “Huawei Digital Power” компанияси Ёвроосиё бўлими бош директори Сю Хай Ўзбекистонда қайта тикланадиган энергия манбаларини амалиётга татбиқ этишда давлат томонидан катта эътибор қаратилаётганини қайд этди.
[gallery-8864]
– Анжуманда биз қайта тикланадиган энергия манбаларини мамлакат иқтисодиётига жорий этиш, айниқса, қуёш энергетикасини ривожлантиришга эътибор қаратишнинг афзалликларини муҳокама қилдик, – деди “Huawei Digital Power” компанияси Ёвроосиё бўлими бош директори Сю Хай. – Ўзбекистонда қуёш энергетикасини ривожлантириш салоҳияти жуда катта ва унинг тўлиқ татбиқ этилиши давлатга иқтисодиётни трансформациялаш ва рақамлаштиришни жадаллаштиришга ёрдам беради. Бундай натижалар йирик электр станциялари, тижорат ва саноат тармоқлари ва турар-жойлари учун асосий энергия манбаи сифатида ақлли ечимларга ўтишни тезлаштиради. Иқтисодиётнинг турли тармоқларида қуёш технологиялари кенг тарқалганлигини ҳисобга олган ҳолда, бутун саноатнинг саъй-ҳаракатлари туфайли қуёш электр энергиясини ишлаб чиқариш таннархи пасаймоқда. Бу эса қуёш энергиясини тармоқ паритетига эришиш учун биринчи қайта тикланадиган манбага айлантиради.
Таъкидлаш керакки, 2021 йилда “Huawei” компанияси илмий-тадқиқот инвестициялари бўйича дунёда иккинчи ўринни эгаллади. Бунда асосий эътибор кам углеродли технологияларни ривожлантиришга қаратилди. Шу мақсадда “Huawei Digital Power” компанияси ишга туширилди. 2022 йил сентябрь ойида “Huawei” компанияси ва Ўзбекистон Республикаси Энергетика вазирлиги ўртасида тузилган шартномага кўра, мамлакатимизда “яшил” энергетикани ривожлантириш соҳасида ҳамкорликни мустаҳкамлаш кўзда тутилган.
“Ўзэлтехсаноат” уюшмаси матбуот котиби Намоз Толиповнинг таъкидлашича, ўтказилган анжуман уюшма ва “Huawei” компанияси ўртасида ҳамкорликни янада мустаҳкамлашга хизмат қилади.
– Уюшма томонидан Президентимизнинг 2022 йил 9 сентябрдаги фармони ижросини таъминлашга катта аҳамият қаратилмоқда. Шу сабабли, бугунги анжуман ҳам ушбу ҳужжат ижроси доирасида ташкил этилган бўлиб, унда 70 га яқин маҳаллий ташкилот ва корхона вакиллари иштирок этмоқда. Мақсад эса мамлакатимизда қайта тикланадиган энергия манбаларини кенг кўламда татбиқ этиш ва хорижий ишлаб чиқариш корхоналари томонидан аҳоли ҳамда хўжалик субъектлари фойдаланишига мўлжалланган юқори технологик маҳсулотлари ишлаб чиқаришни йўлга қўйишдир.
Насиба ЗИЁДУЛЛАЕВА, ЎзА