ФОТОРЕПОРТАЖ

Фарғона вилояти Қувасой шаҳри ҳудудида барпо этилган интенсив боғларда ўрик, олма, гилос, олхўри, шафтоли, нок каби сархил мевали дарахт ниҳоллари экилиб, серҳосил, иқлимга мос навлар кўпайтирилмоқда. Айни кунларда Валик қишлоғига келсангиз, ҳосилга кирган боғларни кўриб, кўзингиз қувнайди.  

Маҳалла ҳудудидаги “Қувасой Нодиржон” кўп тармоқли фермер хўжалиги 2019 йилда ташкил этилган. Боғдорчиликка ихтисослаштирилган ушбу фермер хўжалигида айни пайтда ўрик, шафтоли, нок, олма ҳамда эртапишар гилос етиштирилмоқда. Хўжаликнинг умумий ер майдони 40,3 гектар, ундан 30 гектари интенсив боғдир. Аҳамиятлиси, интенсив боғ майдонида сув тежамкор технологиялар асосида томчилатиб суғориш йўлга қўйилган. Айни кунларда пишиб етилган гилос бир қисми харидорларга етказиб берилмоқда. Ҳосилнинг асосий қисми Россия давлатига экспорт қилинаётир.

[gallery-17726]

Таъкидлаш жоиз, мазкур фермер хўжалигида меҳнат қилаётган миришкор боғбонлар соҳани ривожлантириш мақсадида соҳа олимлари билан ҳамкорликни йўлга қўйган. Шунингдек, улар эълон қилинаётган қатор хорижий грантларда ҳам ўз лойиҳалари билан иштирок этиб келмоқда. Жумладан, 2021 йилда соҳибкорлар БМТнинг Фарғона вилоятида иқлим ўзгарувчанлиги бўйича грантида ўз лойиҳаси билан қатнашиб, 20 минг АҚШ доллари қийматидаги боғдорчиликка керак бўладиган зарур техника ва жиҳозларга эга бўлди. Япония ва Германия давлатлари ҳомийлигида ташкил қилинган “АFC” лойиҳасидаги иштироки ҳам уларга катта самаралар берди.

<iframe width="640" height="420" src="https://www.youtube.com/embed/9pXqF8vzPsQ" title="Quvasoy bogʻlarida" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Муқимжон ҚОДИРОВ (сурат, видео), ЎзА