2026 йил боғбонлар учун хушхабар билан бошланди. Уларнинг айтишича, май ойининг 10-15 санасигача пишиб, ранг олиб, истеъмол қилиш мумкин бўлган шафтоли нави яратилибди. Уни Европадаги оталиқ кўчатга нисбат бериб патагония деб атабдилар.

Қувада Ботировлар оиласини яхши билишади ва ҳурмат қилишади. Сабаби бу оилада мана бешинчи авлод кўчатчилик билан шуғулланади ва улар етиштирган кўчатлар бехато унади, серҳосил ва эртапишар бўлади. Жаҳонгир сулоланинг энг кичиги. Аммо боболарига муносиб.

– Биз 10 гектар майдонда кўчат етиштирамиз. Улар гилос, шафтоли, ўрик, нок, беҳи, олхўри кабилар бўлиб, бир йилда 800 минг донани ташкил қилади, – дейди боғбон Жаҳонгир Ботиров. – Шунингдек, янги навлар яратиш устида ҳам иш олиб борамиз. Мана, бу шафтолининг патагония навидир. Буниси эса бигбен нави.

Жаҳонгир боғдорчиликда ер ютиб олган янги боғбонлар билан кўчатчиликка майдон ажратиш ва икки йилда боғ яратиб бериш тўғрисидаги шартнома асосида ишлайди. Бундан ҳар икки томон ҳам ютади.

– Бу кўчатлар нок. 2024 йилда экиб, 2025 йилда пайванд қилдик. Бу йил кузда тайёр бўлади, – дейди боғбон.  

Энг нозик кўчат нок. Илгари у 7-10 йилда мевага кирган. Жаҳонгир уч ёшли кўчатни мева тутадиган қила олди. Шунданми, у етиштираётган кўчатларга узоқ вилоятлар, ҳатто хорижий давлатлардан ҳам харидорлар бор. Шунинг учун етилган кўчатларни кўчириб буюртмачига юборишга аллақачон тайёрлаб қўйди. Чилла совуғи ўтса, уларни керакли манзилга етказиш ва экиш мумкин бўлади.

–Етиштирган кўчатларимизни Қозоғистон, Россия, Қирғизистон, Тожикистон давлатларига экспорт қиляпмиз. Тожикистон билан Қирғизистон кўпроқ олма ва ўрик кўчатларини олади.  Шунингдек, манзарали кўчатлар ҳам етиштирамиз. Қорақалпоғистон Республикасига 25 минг дона манзарали кўчатлар тайёрлаб қўйдик. Бугун-эрта жўнатамиз.  

Қувада қайси кўчатчи боғбон билан суҳбатлашманг, ҳаётидан мамнун. Шафтолининг янги нави оммалашса, яна даромади ошади. Жаҳонгир Ботиров ҳам шу фикрда:

– Аввало солиқларни тўлаймиз. Кўчатчилик билан шуғулланиб топган даромадимизга уй қурдик, машина сотиб олдик, тўйлар қилдик. Хуллас, бир оиланинг барча камини қоплайди.

<iframe width="640" height="420" src="https://www.youtube.com/embed/eh1-TvDQlaQ" title="Quvada shaftolining yangi navi yaratildi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Муҳаммаджон Обидов, Элёр Олимов (видео, сурат), ЎзА