Қутқарувчилар чўкиб кетган Гонконг кемаси экипажининг 12 аъзосини топишди
22 нафар кема экипажидан 12 нафари Жанубий Корея ва Япония ўртасидаги сувликдан топилган, бироқ улардан 11 нафари ҳушсиз. Жанубий Корея ва Япония соҳил қўриқчилари биргаликда қидирув ишларини олиб бормоқда, деб ёзмоқда Рёнхап агентлиги.
Аввалроқ Гонконгда рўйхатдан ўтган юк кемаси бортида 22 киши билан Шарқий Хитой денгизининг Дандзё ҳудудида чўкиб кетгани хабар қилинган эди. Мазкур ҳудуд Япониянинг Нагасаки префектурасига қарашли. NHK телеканали Япония соҳил қўриқчиларига таяниб тўрт киши қутқариб олингани ҳақида маълум қилганди.
Агентлик маълум қилишича, бортига ёғоч маҳсулотлари ортган Jin Tian юк кемаси Жанубий Кореянинг Чежудо оролидаги Согвипхо шаҳридан 148,2 километр узоқликда чўкиб кетган. Кемада 14 нафар хитойликлар ва саккиз нафар мьянмаликлар бўлган.