Швециянинг НАТОга аъзо бўлиб кириши Анқара талабини бажаришдан бош тортаётган Стокгольмнинг амалга ошмай қолган орзусидир. Туркия парламенти спикери Нўъмон Қуртулмушнинг бу баёнотини “Milliyet” газетаси чоп этган.

– Туркия, Швеция ва Финляндия ўртасида уч томонлама келишув мавжуд, – таъкидлади спикер. – Айримлар иғвогарона ҳаракатлар қилишади ва яна НАТОга кириш йўлида қўллашни сўрашади. Туркия сўзида турадиган давлат. Нимани ваъда қилган бўлса, ўшани амалга оширади. Мухолифларимиз ҳам сўзида туришини истаймиз. Ваъдасини бажармаётган Швеция НАТОга қўшилишни, шунчаки, орзу қилиб, кутмоқда.  

Қуртулмуш “террор ташкилотларини қўллаб-қувватлаган, уларга паноҳ берган” Швециянинг НАТОга аъзо бўлиш истаги туфайли Туркия “кучли босим остида” эканини қайд этди.  

“Талабимиз бажарилмагунча, Туркия бу йўлда бирор қадам ҳам ташламайди”, дея қўшимча қилди парламент раиси.