Хоразм вилоят ҳудудий қурилиш ва уй-жой коммунал хўжалиги соҳасида назорат қилиш инспекцияси томонидан Оммавий ахборот воситалари вакиллари учун “Вилоят ҳудудида олиб борилаётган қурилиш соҳасида ислоҳотларни янада чуқурлаштириш, бюрократик тўсиқларни камайтириш, инновацион ғоялар, ишланмалар ва илғор ахборот-коммуникация технологияларини кенг жорий этиш, шунингдек, қурилишнинг барча босқичларида шаффофликни таъминлаш, бу борадаги янгиликларни амалиётга кенг жорий этиш борасидаги ишлар” мавзусида матбуот анжумани ва пресс-тур ташкил этилди.

Анжуман аввалида давлатимиз раҳбарининг жорий йил 14 апрелдаги “Қурилиш ва уй-жой коммунал хўжалиги соҳасида давлат назоратини самарали ташкил қилиш чора-тадбирлари тўғрисида”ги фармонида белгиланган вазифалар, соҳадаги янгиликлар ҳақида маълумот берилди. 
Шундан сўнг ҳудудий инспекция томонидан жорий йилнинг ўтган 8 ойи мобайнида амалга оширилган ишлар ҳақида гап борди. 
– Айни пайтда вилоятда жами 2126 та қурилиш объектида давлат назорати олиб борилмоқда, – дейди ҳудудий инспекция бошлиғи Шерзод Отаев. – Мазкур объектларда бугунги кунга қадар инспекторлар томонидан жами 19 минг 242 маротаба мониторинг ишлари ўтказилди. Мониторинг натижаларига кўра, аниқланган камчиликларнинг бартараф этилиши юзасидан 700 минг 878 та ёзма кўрсатма берилди. Қўлланилган сифатсиз қурилиш материаллари ва буюмлари юзасидан 65 та, лойиҳалаштиришда мавжуд камчиликларга йўл қўйилганлик учун 9 та масъул ташкилотларнинг лицензия ва рухсат берувчи ҳужжатлари бекор қилиниши бўйича тегишли ташкилотларга тақдимномалар киритилди. Жами 168 та ҳолатда эса аниқланган сифатсиз қурилиш-монтаж-ишлари буздирилди. Шунингдек, аниқланган ҳуқуқбузарликлар юзасидан 790 та ҳолат учун 4 миллиард 208 миллион сўмлик маъмурий жарималар расмийлаштирилди.
Анжуманда таъкидландики, вилоятда истеъмолчиларга етказиб берилаётган ичимлик суви сифатини ўрганиш бўйича 1 минг 372та таҳлил намуналари олиниб, шундан 12 та ҳолатда ичимлик сувининг белгиланган миллий стандарт талабларига жавоб бермаслиги аниқланди. Оқова сувларни чиқариб юборишда ҳам 334 та ноқонуний ҳолатлар аниқланиб, қоидабузарлардан 547 миллион сўмлик қўшимча тўловлар ундирилиши белгиланган.
Тадбирда ОАВ вакилларига сейсмик хавфсизликни таъминлаш тизими такомиллаштирилиши билан боғлиқ қонуннинг мазмун - моҳияти ҳам тушунтирилди. 
– Жорий йилнинг 25 март куни “Сейсмик хавфсизликни таъминлаш тизими такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиришлар киритиш тўғрисида”ги Ўзбекистон Республикасининг қонуни қабул қилинди, – дейди ҳудудий инспекция бошлиғи ўринбосари Комилжон Шомуродов. – Мазкур қонун билан Ўзбекистон Республикасининг Жиноят кодексига бинолар ва иншоотлардан фойдаланишга доир қонунчиликни бузган ҳолда кўп квартирали уйлардаги таянч конструкцияларни ўзгартирганлик ва реконструкция қилганлик, шунингдек, бинолар ва иншоотлар, аҳоли пунктларининг тасдиқланган бош режаларини, уларни режалаштириш ва қуриш лойиҳаларини бузган ҳолда лойиҳалаштирганлик, реконструкция қилганлик ва қурганлик учун жавобгарлик юзага келишини назарда тутувчи ўзгартиришлар киритилган. Бунда жиноий жавобгарлик айбдор шахслар ушбу ҳуқуқбузарликлар учун маъмурий жавобгарликка тортиб бўлинганидан кейин юзага келади. 

[gallery-25273]

Матбуот анжуманида иштирок этганлар ўзларини қизиқтирган саволларга жавоб олдилар.
Пресс-тур қатнашчилари Урганч тумани Оқ ариқлар маҳалласи ҳудудида барпо қилинаётган Ал-Хоразмий шаҳарчасида қурилиш-монтаж ишларининг текширув жараёнлари ва Қурилиш-синов лабораторияси синов жараёнлари билан танишдилар. 

<iframe width="791" height="445" src="https://www.youtube.com/embed/yP1SRNwKpd0" title="Qurilish ishlari nazoratda" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Аҳмаджон Шокиров, 
Беҳзод Саидов (сурат, видео), ЎзА