Surxondaryo viloyatidagi Qumqo‘rg‘on tumani paxtakorlari ob-havo injiq kelgan bu yilgi sharoitda g‘o‘za parvarishlashda omilkorlik bilan mehnat qilib, rejani oshig‘i bilan uddaladi.

Joriy yil erta bahorda «Termiz- Jayxun» klasteri va 133 fermer xo‘jaligi 7 ming 952 gektar maydonda g‘o‘zaning «Besh qahramon», «Buxoro 102», «S6585» kabi tezpishar va serhosil navlarini parvarishlab, mavjud agrotexnik tadbirlar asosida parvarishladi. Suv taqchil kelgan yilda obi-hayotdan oqilona foydalanib, o‘z vaqtida mahalliy va mineral o‘g‘itlar bilan oziqlantirdi. Yagona, qator oralarini yumshatish, g‘o‘zani chilpish kabi yumushlar ham belgilangan muddatlarda sifatli amalga oshirildi. Mo‘l hosil to‘plandi.

Tumanda paxta yig‘im-terim mavsumi ham uyushqoqlik bilan boshlandi. Muhim bu yumush otryad usulida tashkil etilib, 134 ta terim otryadi shakllantirildi. Ularga 24 ming 862 terimchi jalb qilinib, terim pulini o‘z vaqtida berish yo‘lga qo‘yildi. Bir oyda mo‘ljaldagi hosil terib-yig‘ib olinib, reja ortig‘i bilan uddalandi. Qabul punktlariga 27 ming 470 tonna sifatli xom ashyo topshirildi.

Tajribali mutaxassislar hosil yig‘im-terimining tez, sifatli va har yilgidan erta amalga oshirilishi keyingi yillarda qishloq xo‘jaligida olib borilayotgan islohotlar hamda klaster usulida mahsulot yetishtirishning yo‘lga qo‘yilgani, yerga bo‘lgan munosabatning tubdan o‘zgarib, moddiy manfaatdorlik oshganining amaldagi samarasi ekanini aytmoqda.

Ayni paytda tumanda paxta terim-yig‘imi qizg‘in davom etmoqda.

Xolmo‘min MAMATRAYIMOV, O‘zA