Фуқаролик ишлари бўйича Сурхондарё вилояти Қумқўрғон туманлараро судининг 2017 йил 11 августдаги суд буйруғига асосан А.Таировдан бир нафар вояга етмаган фарзандининг моддий таъминоти учун иш ҳақи ва бошқа даромадларининг ¼ қисми миқдорида алимент ундириш белгиланган.

Мазкур ижро ҳужжати Бюронинг Қумқўрғон туман бўлими иш юритувига қабул қилиниб, ижро ҳаракатлари олиб борилган. Ижро ҳужжати бўйича қарздор ота МИБ туман бўлимига мурожаат этиб, хорижга чиқиш истаги борлигини маълум қилган ва ўрнатилган чекловларни қонуний тартибда бекор қилишни сўраган.  

Алиментчи отанинг мурожаатини тинглаган давлат ижрочилари унга алимент учун қўлланилган чекловларни бекор қилиш тартибларини атрофлича тушунтирди. Шундан сўнг А.Таиров турмуш ўртоғи билан ўзаро келишиб, фарзандининг 18 ёшгача бўлган моддий таъминоти учун ҳисобланган 91 миллион сўм алимент пулини олдиндан тўлиқ тўлаб берди.  

Мазкур ҳолатда ундирувчининг аризасига асосан ижро ҳужжати қайтарилиб, МИБ Қумқўрғон туман бўлими алиментчи отага нисбатан қўллаган барча чекловларни бекор қилди.  

Холмўмин МАМАТРАЙИМОВ, ЎзА