Қозон шаҳридаги 175- ўрта мактабда содир этилган отишмада саккиз ўқувчи ва бир ўқитувчи аёл қурбон бўлди, деб хабар қилади РИА Новости Татаристон Республикаси матбуот хизмати берган маълумотга таяниб.

Бундан аввалроқ Республика президенти Рустам Минниханов қурбонлар орасида тўрт нафар ўғил бола ва учта қиз борлигини айтган эди. Уларнинг ҳаммаси саккизинчи синф ўқувчиси бўлган.

Тезкор хизмат вакиллари эса 11 киши ҳалок бўлгани ҳақида айтмоқда. Уларнинг икки нафари жиноятчи ўқидан қутулиб қоламан деб, учинчи қаватдан сакраган.

Эрталаб икки қуролланган шахс Жавдат Файзи кўчасидаги 175- ўрта мактаб биносига бостириб кирган. Уларнинг бири қўлга олинган, иккинчиси отиб ўлдирилган.  

Россия Федерацияси президенти Владимир Путин Қозон фожиасидан кейин қурол савдоси қоидаларини тезкорлик билан қайта кўриб чиқишга кўрсатма берди, деди давлат раҳбарининг матбуот котиби Дмитрий Песков.

Шунингдек, Путин ҳалок бўлган ўқувчиларнинг ота-оналарига ҳамдардлик билдирди.

Айни пайтда болалар хавфсиз жойга кўчирилган, улар билан руҳшунос ишлаяпти, дейилади хабарда.

Воқеа бўйича жиноий иш очилган. Бинода тезкор ҳаракат давом этмоқда.

Шаҳарда террорчиликка қарши кураш амалиёти режими жорий қилинди. Барча ўқув муассасаларида хавфсизлик чоралари кучайтирилмоқда.

Эртага Татаристонда мотам куни эълон қилинди.

Вақт ўтган сайин воқеанинг янги тафсилотлари аён бўлмоқда.

Отишма содир этган шахс ҳуқуқ ҳимоячилари билан суҳбатда ўз қилмишининг сабабини ошкор қилган. Бу ҳақда Life Shot Telegram-канали хабар қилмоқда.

Каналнинг ёзишича, отишма содир этган шахс ҳеч кимни яхши кўрмаслигини маълум қилган. Маълум бўлишича, у ушбу мактабни тўрт йил аввал битирган экан.