20 oktyabr, payshanba kuni Senat yalpi majlisida “Qozog‘iston Respublikasi bilan Turkmaniston o‘rtasida Qozog‘iston – Turkmaniston davlat chegarasini delimitatsiya qilish va baliq ovlash zonalarining tutash uchastkalarini delimitatsiya qilish to‘g‘risidagi shartnomani ratifikatsiya qilish haqida”gi qonunni qabul qildi”, deb yozadi Vlast.kz.

Bosh vazir o‘rinbosari – tashqi ishlar vaziri Muxtor Tleuberdining so‘zlariga ko‘ra, kelishuvning kuchga kirishi Qozog‘iston Respublikasining janubiy chegaralarida davlat chegarasini delimitatsiya qilish jarayonini yakunlash imkonini beradi.

“Kelishuvga muvofiq tomonlar Qozog‘iston Respublikasi va Turkmaniston Respublikasi o‘rtasidagi Kaspiy dengizi bo‘ylab davlat chegarasi chizig‘i yo‘nalishini, ularning hududiy suvlarini delimitatsiya qilish va baliq ovlash zonalarining tutash uchastkalarini demarkatsiya qilish chizig‘ini belgiladilar. Ko‘rib chiqilayotgan shartnoma ratifikatsiya qilinishi kerak. Kelishuvning keyinchalik kuchga kirishi Qozog‘istonning janubiy chegaralarida davlat chegarasini delimitatsiya qilish jarayonini yakunlash imkonini beradi”, — dedi Tleuberdi.

O‘z navbatida, senator Nurjan Nursipatov kelishuvning qabul qilinishi yer qa’ridan foydalanish va suv biologik resurslarini yig‘ib olish bo‘yicha suveren huquqlarini amalga oshirish uchun qulay shart-sharoitlar yaratishga xizmat qilishini ta’kidladi.

“Demarkatsiya chiziqlari o‘rta chiziq tamoyili asosida qurilgan – zamonaviy xalqaro dengiz huquqida qarama-qarshi yoki qo‘shni qirg‘oqlari bo‘lgan davlatlar o‘rtasidagi dengiz bo‘shliqlarini chegaralash uchun qo‘llaniladigan umume’tirof etilgan usul”, – deya tushuntirdi u.

Shunday qilib, Kaspiy dengizining iqtisodiy, ijtimoiy va madaniy ahamiyatini inobatga olgan holda, kelishuvni ratifikatsiya qilish natijasi ikki davlatning davlat chegarasida barqarorlikni yanada ta’minlash bo‘ladi.

O‘zA