Qozog‘istonda 2024 yilda jangovar tayyorgarlik tadbirlari doirasida Ozarbayjon va Markaziy Osiyo davlatlari: O‘zbekiston, Qirg‘iziston, Tojikiston vakillari ishtirokida keng ko‘lamli harbiy mashg‘ulotlar o‘tkaziladi.

Bu haqda Qozog‘iston Mudofaa vazirligi matbuot xizmati xabar bermoqda. 

– Bu yil mamlakatimiz hududida beshta davlat ishtirokida keng ko‘lamli o‘quv mashg‘ulotlari bo‘lib o‘tadi va ular yuqori tashkiliy saviyada o‘tkazilishi kerak, — dedi Mudofaa vaziri Ruslan Yaxshiliqov o‘quv mashg‘ulotlarining asosiy yo‘nalishlariga bag‘ishlangan kengaytirilgan yig‘ilishda. – Markaziy Osiyo mintaqasida xavfsizlikni ta’minlash vazifasini bajarishda qardosh xalqlar va qurolli kuchlar o‘rtasidagi do‘stona munosabatlarni saqlab qolish biz uchun nihoyatda muhim. 

Mudofaa vazirining birinchi o‘rinbosari – Qurolli Kuchlar Bosh shtabi boshlig‘i general-leytenant Marat Xusainov 2024 yilda 160 dan ortiq tezkor va 70 mingdan ortiq jangovar tayyorgarlik tadbirlari o‘tkazish rejalashtirilganini ma’lum qildi. Ulardan eng muhimi dengiz floti, havo kuchlari, “G‘arbiy” mintaqaviy qo‘mondonligining maxsus operatsiyalar qo‘shinlari va Ozarbayjon harbiy kontingentlari ishtirokidagi “Birlestik” mashg‘ulotlaridir. 

Yig‘ilish yakunlari bo‘yicha mudofaa vaziri Jaqsiliqov mudofaa vazirligining asosiy vazifalarini belgilab berdi. Mahalliy mudofaa sanoatini, milliy ishlab chiqarish va ta’mirlash bazalarini rivojlantirish, jangovar tayyorgarlik sifatini oshirish, armiyani rejali qayta qurollantirish, harbiy tayyorgarlikdan o‘tgan zaxiralar ulushini oshirish va idoralararo muvofiqlashtirishni takomillashtirishga alohida e’tibor qaratiladi. 

O‘zA