Деҳқончилик пок ният билан ёндашувга боғлиқ экан. Йил бошида Фарғона вилоятининг Қўштепа туманида ерга чигит ташлаётиб, бу йил вилоятда биринчи бўлиб режани бажарайлик, дея дуои фотиҳа қилган эдилар.

Қўштепа тумани ўтган йили 24638 тонна пахта ҳосили йиғиб олди. Ўртача ҳосилдорлик эса 36,2 центнерга етди. Шунда қўштепалик пахтакорлар биз катта натижага эришдик, деган эдилар. Дарҳақиқат, туманда бирон марта ўртача ҳосилдорлик бу рақамга етмаган. Лекин 2025 йилда қўштепаликлар ўтган йилга нисбатан 390 гектар камроқ майдонга чигит эккан бўлсалар ҳам, бугунгача 28500 тонна пахта йиғиб-териб олинган. Ҳосилдорлик эса 30 октябргача 44,5 центнерга етган. Аммо ҳали далаларда ҳосил бор ва йиғим-терим давом этмоқда. Хўш, Қўштепа тумани деҳқонларининг бундай натижага эришиши сабаблари нимада? 

– Ҳали ҳам пахтани теришда давом этяпмиз. Хитой чигитини экаётганимизда мутахассислар ҳосилдорлик 45 центнерга етади деганларида ишонмаган эдик, – дейди “Рихситилла Ҳамидуллаев“ фермер хўжалиги раҳбари Сайфулло Умаров. – 76 схемага ўтаётганимизда эса ҳар бир қатордан 16 сантиметрдан ютқазарканмиз, дегандик. Йўқ, кўчат сони камаймади. Аксинча, қўшқатор ҳисобига 60 схемадан кўра кўпроқ кўчат етиштирдик. 

Ҳа, Қўштепа фермерлари эришган ютуқларнинг сабабларидан бири – чигитнинг қўшқатор экилганида эди. Ҳар гектарда 200-250 минг кўчат ундириб олдилар. Иккинчи омил, уруғни янгилаш ва плёнка остига экишнинг оммалашгани бўлди.

– Бу йил 40 гектар майдонга Хитойнинг 52- навли чигитини экдик, – дейди “Саид Иброҳим ота” фермер хўжалиги раҳбари Муҳаммадзокир Қодиров. – Агар шу майдондаги пахтани ҳам териб олсак, ўртача ҳосилдорлик ҳар гектаридан 56-57 центнерга етади. Плёнка остига чигит экилганида 55-60 центнер ҳосил олиш имкони борлигини мен амалда кўрдим.

Деҳқонлар бу билан чегараланиб қолмадилар. Томчилатиб суғоришни йўлга қўйишди.

– Деҳқончиликнинг энг нозик томони ҳар ишни ўз вақтида бажаришдир. Агар вақтидан ўтказиб юборилса, уни энди келаси йил қилиш мумкин бўлади. Томчилаб суғоришнинг афзаллиги шундаки, айтилган вақтда хоҳлаган ер бўлагини суғориш мумкин бўлади, – дейди Муҳаммадзокир Қодиров.

“Саид Иброҳим ота” фермер хўжалиги тажрибаси туманда барча хўжаликлар учун ўрнак эди. Ахир, ғалладан 80, пахтадан 57 центнер ҳосил олишнинг ўзи бўладими?! Муҳаммадзокир ака билганини баҳам кўрди. Унинг изидан бориб, яхши натижаларга эришаётганлардан бири “Рустам Равшанов” фермер хўжалигидир.

– Пахтадан 45-46 центнердан ҳосил олдик. Ўрнига Россиядан келтирилган дон уруғларини экдик. Унинг тавсифномасида 100 центнергача ҳосил беради, деб кўрсатилган, – дейди “Рустам Равшанов” фермер хўжалиги иш юритувчиси Ойбек Ҳалимжонов. 

Ойбек Ҳалимжоновнинг сўзларида жон бор. Чунки дон уруғи экишда ҳам Қўштепада агротехника қоидаларига тўлиқ риоя қилдилар.

– Экишдан олдин 500 килограммдан аммофос, 100 килограммдан калий сочдик ерга. Илгарилари ҳеч қачон калий қўшилмас эди, – дейди таажжубини яшира олмаган Сайфулло Умаров. – Уни фақат пахтага солар эдик. Бу йил фермерлар ўртача дондан 60-70 центнердан ҳосил олган бўлса, келаси йил 100 центнерга етиши учун барча имконият бор.

Келаси йил учун бугун эзгу ният билан иш бошлаганларнинг тилаклари ижобат топса ажаб эмас. Зеро, бугунги амалларнинг ўзи ҳам аслида кутилмаган эди.

– Терим машиналари қисқа муддатда пахтани териб олди. Биз пешма-пеш ғалла экдик. Натижада мана бугун 30 октябрь кунида туман бўйича 7600 гектар майдонга дон экишни якунладик. Туман тарихида ҳеч қачон 30 октябрь куни дон экиш якунланмаган, – дейди Сайфулло Умаров.

<iframe width="650" height="420" src="https://www.youtube.com/embed/T8rkr5JrTG0" title="Qo`shtepa tumani paxta etishtirishda ham, don ekishda ham birinchi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Муҳаммаджон Обидов, Элёр Олимов(видео,сурат), ЎзА