Қишлоқ хўжалиги техникаларини рўйхатдан ўтказиш, улардан фойдаланиш ва мавсумга тайёргарлиги бўйича назорат тадбирларини амалга ошириш “Ўзагроинспекция” вазифаларидан бири ҳисобланади.

“Ўзагроинспекция” ахборот хизмати раҳбари Холида Шодиеванинг маълум қилишича, 2024 йил ҳосили учун ғалла экишга ер тайёрлаш ишларида 3 ярим минг дона ҳайдов трактори ва 2 минг 588 дона ер текислагич, шунингдек, ғалла экиш ишларида 1 минг 107 дона ғалла экиш сеялкаси ҳамда 10 мингдан ортиқ ғўза қатор ораларига буғдой экадиган культиватор мосламаси қатнашмоқда. Инспекция томонидан ушбу қишлоқ хўжалиги техникаларининг техник ҳолати тўлиқ кўрикдан ўтказилган. Қайд этилишича, мавсумда қатнашаётган техникаларнинг деярли 60 фоизини охирги 5 йилда ишлаб чиқарилган техникалар ташкил этади.

Мутахассисга кўра, жорий йилнинг ўзида хорижий давлатларда ишлаб чиқарилган 80 дан ортиқ юқори унумли дон экиш сеялкалари ҳарид қилинган. Натижада мазкур дон экиш сеялкалари ёрдамида уруғни майдон бўйлаб тенг тақсимлаш ва бир хил чуқурликка экиш имконияти мавжуд бўлди.

“Ўзагроинспекция” томонидан 2024 йил ҳосили учун ғалла экиш мавсумида қатнашаётган қишлоқ хўжалиги техникаларининг техник ҳолати ва улардан самарали фойдаланилиши устидан доимий назорат ўрнатилган бўлиб, ушбу ишлар мавсум якунига қадар давом эттирилади.

Шунингдек, жойларда “Ўзагроинспекция” ва ИИВ ЙҲХБнинг тегишли инспекторлари билан биргаликда ҳафтанинг ҳар пайшанба куни қўшма рейдлар ташкил этилмоқда. Шунга асосан, 2023 йил давомида республика бўйлаб 3 минг 720 маротаба ҳамкорликдаги қўшма рейд ташкил этилган.

Ташкил этилган қўшма рейдлар натижасида “Ўзагроинспекция”нинг ҳудудий бошқарма ходимлари томонидан 3 минг 419 та ҳолатда тракторчи-машинистга нисбатан маъмурий чора қўлланилган. Қўлланилган маъмурий чораларнинг аксариятида тракторчи-машинистлар томонидан тракторлар, комбайнлар, бошқа ўзи юрар қишлоқ хўжалик, мелиорация ва йўл-қурилиш машиналаридан техник жиҳатдан фойдаланиш ва техника хавфсизлиги қоидаларини қўпол равишда бузиш ҳолатлари аниқланган ҳамда МЖтКнинг 112-моддасига асосан маъмурий баённомалар расмийлаштирилган.

Шу билан бирга, транспорт воситаларини бошқариш ҳуқуқини берувчи ҳужжатлари, транспорт воситасини рўйхатдан ўтказганлик тўғрисидаги, шунингдек транспорт воситасига эгалик қилиш, эгаси йўқлигида ундан фойдаланиш ёки уни тасарруф этиш ҳуқуқини тасдиқловчи ҳужжатлари, ишончномалар, транспорт воситаларини бошқа шахсга ўтказиш ва ижарага бериш шартномаларини рўйхатдан ўтказмасдан (ҳисобга қўймасдан) транспорт воситаларини бошқариш) бўйича тракторчи-машинистларга нисбатан МЖтКнинг 135-моддасига асосан маъмурий чоралар қўлланилиб, баённомалар расмийлаштирилган.

Бунинг натижасида белгиланган тартибда давлат рўйхатидан ўтказилмасдан фойдаланиб келинаётган икки юздан ортиқ қишлоқ хўжалиги, мелиорация ва йўл қурилиш техникаси аниқланиб, давлат рўйхатидан ўтказилди. Қўшма рейдлар давомида мажбурий йиллик техник кўрикдан ўтказмасдан фойдаланиб келинаётган беш юзга яқин қишлоқ хўжалиги, мелиорация ва йўл қурилиш техникаси аниқланиб, йиллик техник кўрикдан ўтказилган.

Муҳайё Тошқораева, ЎзА