Чирчиқ шаҳрида бўлиб ўтган регби-7 бўйича мамлакат кубоги беллашувида бош совринни қўлга киритган Қорақалпоғистон Республикаси аёллар жамоаси аъзолари Нукус темир йўл вокзалида тантанали кутиб олинди.

Маросимда Қорақалпоғистон Республикаси Спортни ривожлантириш вазирлиги, Нукус шаҳар ҳокимлиги мутасаддилари, мураббийлар, кенг жамоатчилик вакиллари иштирок этиб, спортчиларни қўлга киритган ғалабаси билан муборакбод этди. Жамоа аъзоларига эсдалик совғалари топширилди.

– Қорақалпоғистонлик аёллар жамоаси бешинчи бор кубокни қўлга киритиб, мамлакатимизда тенгсиз эканлигини яна бир марта исботлади, – дейди бош мураббий Антон Михайлов. – Бугунги кунда 11 нафар ўйинчимиз Ўзбекистон терма жамоаси аъзоси ҳисобланади. Энди улар жорий йилнинг октябрь ойида Тошкент шаҳрида бўлиб ўтадиган Осиё чемпионатига тайёргарлик кўради.

Довуд Абибуллаев, ЎзА