Кейинги йилларда мамлакатимизда қоракўл маҳсулотларини ишлаб чиқариш ҳажмини ошириш ва уларнинг турларини кўпайтиришга қаратилган кенг кўламли ишлар амалга оширилди.

Хусусан, Қоракўлчилик ва чўл экологияси илмий-тадқиқот институти томонидан наслчилик ва сунъий уруғлантириш ишларини илмий асосда тизимли ташкил этиш, бунда қимматли, экспортбоп сур ва қора рангли қоракўл қўйлари селекциясини амалга ошириш, қоракўлчиликка ихтисослашган фермер хўжаликларида илмий ишланмаларни амалиётда синаш ва унинг ижобий натижаларини ишлаб чиқаришга ва бу борада эришилган илғор ютуқларни амалиётга кенг жорий этиш бўйича тизимли ишлар қилинмоқда.    

Мазкур ишларни янада ривожлантириш ва соҳага хорижий тажрибаларни кенг тарғиб этиш мақсадида Қоракўлчилик ва чўл экологияси илмий-тадқиқот институти ҳамда АҚШнинг ASIS Agriculture LLC компанияси ўртасида ҳамкорлик меморандуми имзоланди.  

Шу муносабат билан институтга АҚШнинг ASIS Agriculture LLC компаниясининг Профессионал ривожланиш бўйича бош мураббийи Дале Генри ва мазкур компаниянинг чорвачилик ва от спорти техникаси клуби раҳбари Мария Пук ташриф буюрди.   

Меҳмонлар институт фаолияти билан танишди. Шу билан биргаликда америкалик мутахассислар институтнинг ноёб қоракўл терилар музейи билан танишиб, республикамизда қоракўлчиликнинг тарихи, бугуни ва истиқболи тўғрисида ўзларини қизиқтирган саволларга жавоб олди. Учрашув сўнгида АҚШнинг  ASIS Agriculture LLC компанияси ҳамда институт ўртасида ҳамкорлик меморандуми имзоланди.  

Гулноза Бобоева,  

ЎзА