Ипакчилик ва жун саноатини ривожлантириш қўмитаси ва “Яйлов хўжалигини ривожлантириш” уюшмаси томонидан яйловлардан фойдаланиш, уларнинг ҳолати ёмонлашиб кетишига йўл қўймаслик, майда шохли наслдор молларни кўпайтириш, кластер иштирокчилари ўртасида кооперация алоқаларини йўлга қўйиш орқали хом ашёни чуқур қайта ишлаш ва маҳсулот ишлаб чиқаришни ташкил этиш бўйича ишлар амалга оширилмоқда.

Хусусан, Навоий вилояти "Учтепа чорва кластери" МЧЖга қарашли бўрдоқичилик комплексида кластерга бириктирилган “Қоракўл Учтепа сур” наслчилик МЧЖдаги яроқсизга чиқарилган қари қўйлар, эркак қўзиларни бўрдоқига боқиш ишлари йўлга қўйилди.    

Бугунги кунда комплексда мавжуд 2 минг бош майда шохли молларнинг озуқага бўлган талабини қондириш мақсадида етарли миқдорда дағал ва кучли озуқалар захиралари яратилган. 

Шунингдек, кластернинг ўзидаги донадор омухта ем ишлаб чиқариш цехида ишлаб чиқарилган озуқалар бўрдоқиланаётган молларга едирилмоқда. Комплекс мустаҳкам моддий-техника базаси билан таъминланган, махсус транспорт, ўт майдалагич ва бошқа зарурий техникалар мавжуд.  

Молларни бурдоқига боқиш даврида уларни ветеринария кўригидан ўтказиш, юқумли ва юқумсиз касалликларга қарши эмлаш ишлари ташкил этилган.  

Гулноза Бобоева, ЎзА