Баъзан кўпчилик фуқароларимизнинг «банклар «қора рўйхати»га тушганим учун кредит ажратмай сарсон қиляпти», мазмунидаги мурожаатларини эшитиб қоламиз.

Соҳа мутахассисларнинг маълум қилишича, банк тизимида «қора рўйхат» тушунчаси, умуман, кредит ажратилиши тақиқланган фуқаролар бўйича тузилган «махсус рўйхат» ёки «маълумотлар базаси» мавжуд эмас.

Қолаверса, «қора рўйхат» тушунчаси етарли билим ва малакага эга бўлмаган айрим банк ходимлари томонидан олинган ёки жорий кредити бўйича тўловларни белгиланган муддатлардан кечиктириб тўлаган фуқароларга «қора рўйхатга тушиб қолгансиз», деб тушунтириши оқибатида вужудга келаётганини айтишди.

Барчага маълум, бугунги кунда кўпчилик фуқаролар кредитлардан фаол фойдаланади. Эндиликда Ягона портал фуқароларга илк фойдаланишда бепул бўлган кредит тарихи хизматини тақдим этади.

Мазкур хизматдан фойдаланиш учун my.gov.uz веб сайтига мурожаат қилиб хизмат номини киритасиз. Ушбу ҳолат аслида фуқаронинг «кредит тарихи» маълумотлари билан боғлиқ бўлиб, ҳозирги кунда ундан барча кредит берувчи ташкилотлар фуқарога кредит беришдан олдин фойдаланишмоқда.

Маълумот ўрнида айтиш жоиз, кредит тарихи, бу – сизнинг кредит ва қарзларингиз ҳақидаги маълумот. Унда кредитлар қачон, қанча миқдорда ва қаердан олинганлиги, кейин қандай қайтарилганлиги ва буни ким сўрагани тўғрисидаги маълумотлар мавжуд. Буларнинг барчаси my.gov.uz порталининг кредит тарихи бўлимида сақланади.

Кредит тарихини илк марта бир йилда бир маротаба бепул олиш мумкин. Пуллик тартибида эса исталганча олиш мумкин. Кредит тарихида хатолар аниқланса, уларни банк орқали тузатиш мумкин.

Кредит тарихини нафақат банк, балки суғурта компанияси, нотариус, суд ёки иш берувчи фуқаро розилиги билан текшириши мумкин.

Шаҳноза Маматуропова, ЎзА