Жамият ва давлат ҳаётининг барча соҳаларида коррупциянинг олдини олиш, коррупцияга оид ҳуқуқбузарликларни содир этиш сабаб ва омилларини аниқлаш ҳамда бартараф этиш мақсадида “коррупциядан холи қонунчилик” тамойили асосида тизимли ишлар амалга оширилмоқда.

Адлия вазирлигида “Қонунчилик ҳужжатлари ва уларнинг лойиҳаларини коррупцияга қарши экспертизадан ўтказиш тартиби ва амалиёти” мавзусида ўтказилган семинарда шу ҳақда сўз юритилди.  

Тадбирда 50 дан зиёд вазирлик ва идоралар, шунингдек, оммавий ахборот воситалари вакиллари иштирокида қонунчилик ҳужжатларини коррупцияга қарши экспертизадан ўтказиш тартибининг муҳим жиҳатлари муҳокама қилинди.  

Қонунчилик палатаси, Коррупцияга қарши курашиш агентлиги ва Бирлашган Миллатлар Ташкилоти Гиёҳванд моддалар ва жиноятчилик бўйича бошқармасининг Марказий Осиёдаги минтақавий ваколатхонаси вакили иштирокида коррупцияга қарши экспертиза ўтказишнинг аҳамияти ва тартиби тушунтирилди. Эришилган натижалар бўйича маълумотлар тақдим этилди.  

Адлия вазирлигига 2020 йилда ҳуқуқий экспертиза учун киритилган қонунчилик ҳужжатлари лойиҳаларининг 9 фоизида коррупциявий омил аниқланган бўлса, 2021 йилда коррупцияга қарши экспертизанинг янги тартиби ўрнатилгани боис ушбу кўрсаткич 13 фоизга, 2022 йил 15 фоиз, 2023 йилда эса 16 фоизга етган.  

Коррупцияга қарши экспертизадан ўтказиш бўйича амалиётда учраётган муаммолар муҳокама қилинди ҳамда уларни бартараф қилиш бўйича тадбир иштирокчиларига услубий ёрдам кўрсатилди.  

Н.Абдураимова, ЎзА