Президент, ижод ва ихтисослаштирилган мактабларни ривожлантириш агентлиги тасарруфидаги Абдулла Қодирий номидаги ижод мактаби, Абдулла Қодирий уй-музейи ҳамда Ислом Каримов номидаги Тошкент давлат техника университети ҳамкорлигида Абдулла Қодирий таваллудининг 127 йиллиги муносабати билан «Абдулла Қодирий - миллат кўзгуси» мавзуида маънавий-маърифий анжуман ташкил этилди.

Абдулла Қодирий уй музейида бўлиб ўтган тадбирда университет ректори С.Туробжонов, ижод мактаби директори Н.Йўлдошева, қодирийшунос олимлар, кенг жамоатчилик вакиллари иштирок этди.  

Анжуманда Ўзбекистон Миллий академик драма театри, Муқумий номидаги Ўзбекистон давлат мусиқали драма театри актёр ва актрисалари ижросида «Ўткан кунлар», «Меҳробдан чаён» асарларидан саҳна кўринишлари, шунингдек, «Қодирий издошлари» тўгараги аъзоларининг «Қодирийга армуғон» номли бадиий-ижодий намуналари намойиш этилди.  

Тадбир доирасида Тошкент давлат техника университети ташаббуси билан таъсис этилган «Қодирий издошлари» стипендияси III чорак якуни бўйича энг юқори натижаларга эришган 4 ўқувчига топширилди.  

Абдулла Қодирий номидаги ижод мактабининг 6-синф ўқувчиси М.Хуррамова, 7-синф ўқувчиси Г.Маманабиева, 8-синф ўқувчиси С.Абдуллаева, 9-синф ўқувчиси С.Эгамберганова тақдирланди.

Файзулло Яҳёев, ЎзА