ФОТОРЕПОРТАЖ

Навоий вилоятининг шимоли-ғарбий қисмида ястанган Қизилқум чўлининг табиати ўзига хос бўлиб, унинг асосий қисмини баланд ва ўртача текисликдаги қумлар ташкил қилади. Қизилқум иқлими континентал, қиши совуқ, ёзи иссиқ қуёшли ва қуруқ бўлади. Қиш пайтида ҳаво ҳарорати –31, –33 даражагача пасайиб кетади. Ёзда эса ҳарорат 48 даража иссиқ бўлади. Қумларнинг усти +75, +80 даражагача қизийди. Бу ерда ёғингарчилик кам бўлади.  

Бепоён Қизилқум чўли бўйлаб кетишда, баланд-баланд қумтепаликлар кўзга ташланади. Ушбу тепаликлар айниқса, қуёш ботаётган вақтда ўзига хос гўзаллик касб этади.

[gallery-12450]

Чўлда саксовул, қуёнсуяк, қум акацияси, селин, каврак, юлғин каби қурғоқчиликка чидамли табиий ўсимликлар ўсади. Шунингдек, бу жойларда чўл мушуги, бўри, тулки, кийик, қуён, тошбақа, чаён, қум сичқони, калтакесак, оқ илон, қора қурт каби ҳайвон ва жонзотларни учратиш мумкин.

Айни пайтда Қизилқум тинимсиз саёҳатчилар оқимини ўзига жалб қилаётган сайёҳлик минтақаларидан бирига айланган. Ташриф буюрувчилар кенг даштликларда уни ўзи учун қайта кашф этиш ва хилма-хилликни тадқиқ қилиш имконига эга. Айтишларича, кимки ўз қалбига назар солиш истагида бўлса ва ўзини англашни хоҳласа, бунинг учун энг муносиб жой – саҳро экан.

Сирож АСЛОНОВ(сурат),ЎзА