Фарғона вилояти Бешариқ туманида етиштириладиган Андархон қовунлари туманнинг ўзига хос ташриф қоғозига айланган. Полизчилик азалдан туманнинг “Андархон” ва “Собиртепа” МФЙ аҳолисининг даромад манбаи бўлиб, ушбу ҳудудлар аҳолисининг 70 фоизга яқини қовунчилик билан шуғулланади.

Омилкорлар қовун серҳосил бўладиган экин майдонларини танлашдан тортиб, етиштирилган ҳосилни узоқ муддат, ҳатто, келгуси йилнинг февраль ойига қадар сақлашгача бўлган жараёнларнинг ҳадисини олган. Шу боис, юртимизнинг барча ҳудудларидаги бозорларда Бешариқ қовунларини нафақат ёз ва куз фаслларида, ҳатто, қишнинг чилласида ҳам сотиб олиш имконияти бор. 

– Ҳудудда 350 га яқин хонадон аъзолари бир йилда 700 гектарга яқин экин майдонида қовун етиштиради, – дейди “Андархон” МФЙ ҳоким ёрдамчиси Авазбек Абдураҳмонов. – Бир гектар полиз майдонидан ўртача 5000 донагача сара қовун олинади. Бу бир йилда деҳқонларимиз 3 миллион 500 дона қовун етиштиради, дегани. Айни кунда бир дона қовуннинг нархи камида 15 минг сўм деб олсак, қовунчилик ортидан маҳалламизга бир неча миллиард сўм даромад келаётгани ойдинлашади. 

[gallery-13893]

– Бу йил 40 гектар ерга ёзги, 5 гектар ерга кечки қовун экдик, – деб гапни давом эттиради Бешариқнинг яна бир қовунчиликка ихтисослашган “Собиртепа” маҳалласида истиқомат қилувчи Акмалжон Раҳмонов. – Ёзги ҳосилдан 300-400 миллион сўм даромад қилдик. Айни кунларда 5 гектар ерга экилган кечки ҳосилимизни қовунхоналаримизга жойлаштиряпмиз. Насиб қилса, 20 минг дона сара қовунни янги йил арафасида элимиз дастурхонига тақдим қиламиз.

<iframe width="640" height="360" src="https://www.youtube.com/embed/Q4bJahHXRuM" title="Қишнинг чилласида ҳам дастурхонларни безайдиган Андархон қовунлари" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" allowfullscreen></iframe>

ЎзА фотомухбири
Муқимжон Қодиров олган суратлар