Ўзбекистон Республикаси Вазирлар Маҳкамаси “Қишлоқ хўжалигига мўлжалланган ерларни консервация қилиш бўйича давлат хизматини кўрсатишнинг маъмурий регламентини тасдиқлаш ҳақида” қарор қабул қилди.

Унга мувофиқ, Қишлоқ хўжалигига мўлжалланган ерларни консервация қилиш бўйича давлат хизматини кўрсатишнинг маъмурий регламенти тасдиқланди. 

Регламентда:

консервация қфилинадиган қишлоқ хўжалиги ерларини аниқлаш ва хатловдан ўтказиш тартиби; 

давлат хизмати кўрсатилишини Давлат хизматлари марказлари ёки Ўзбекистон Республикаси Ягона интерактив давлат хизматлари портали орқали ташкил этиш; 

қишлоқ хўжалигига мўлжалланган ерларни консервация қилиш лойиҳаси ва хулосасини ишлаб чиқиш, манфаатдор вазирлик ва идоралар билан келишиш ҳамда тасдиқлаш тартиби; 

қишлоқ хўжалигига мўлжалланган ерларни консервация қилиш лойиҳасида белгиланган муддат тугагандан сўнг ушбу ерларни қишлоқ хўжалигида фойдаланишга қайтариш тартиби; 

қишлоқ хўжалигига мўлжалланган ерларни консервация қилиш тадбирларини молиялаштириш манбаларини белгилаш тартиби белгилаб берилган.

Қарорга  мувофиқ, қишлоқ хўжалигига мўлжалланган ерларни консервация қилиш бўйича мурожаатлар ЯИДХП орқали қабул қилинади ҳамда “E-ijara” ахборот тизимида кўриб чиқилади; 

қишлоқ хўжалигига мўлжалланган ерларни консервация қилиш лойиҳалари Ўзбекистон Республикаси Сув хўжалиги вазирлиги ҳамда Экология, атроф-муҳитни муҳофаза қилиш ва иқлим ўзгариши вазирлиги билан келишилади.

2025 йил 1 ноябрга қадар: 

давлат хизматини кўрсатиш “E-ijara” АТ ҳамда ЯИДХП орқали жорий этилиши таъминланади; 

“E-ijara” АТда ҳамда ЯИДХПда давлат хизмати кўрсатилишининг ҳар бир босқичида мурожаатлар кўриб чиқилишини кузатиб бориш тартиби жорий этилади.

Ушбу Регламент деградацияга учраган, унумсиз, заҳарли саноат чиқиндилари ва радиоактив моддалар билан ифлосланган қишлоқ хўжалигига мўлжалланган ерларни консервация қилиш бўйича давлат хизматини кўрсатиш тартибини белгилайди. 

Қишлоқ хўжалигига мўлжалланган ерлар қуйидаги ҳолларда консервация қилинади: экологик талаблар бузилиши натижасида тупроқ кучли эрозияга, шўрланишга, чўлланишга, ботқоқлашишга учраганда ҳамда яйлов ва пичанзорларда тупроқ-ўсимлик қоплами жиддий таназзулга учраганда; 

тупроқнинг инсон саломатлиги учун хавфли даражада кимёвий моддалар ва бошқа турдаги ифлослантирувчилар билан зарарланиши ёки шўрланиши ёки ишқорлилик даражасининг ошиши натижасида ерларнинг бузилиши юзага келганда; 

тупроқ унумдорлиги ва ҳосилдорлиги жуда пасайганда (унумсиз) ҳамда табиий хусусиятлари бўйича салбий тавсифларга эга бўлганда; 

ерлар йўл қўйилиши мумкин бўлган чегаравий концентрациялардан юқори даражада заҳарли саноат чиқиндилари, радиоактив моддалар, оғир металлар ва бошқа кимёвий элементлар билан ифлосланганда;

ер участкалари собиқ қишлоқ хўжалиги аэродромлари сифатида фойдаланилган ерлар бўлганда.

ЎзА