Бухоро вилояти ҳокими Ботир Зарипов “UHM LANDTECH” масъулияти чекланган жамият шаклидаги хорижий корхона бош директори Бахтиёр Сабуров бошчилигидаги делегацияни қабул қилди. Корхона АҚШнинг “Valmont Industries Inc.” компанияси расмий дилери ҳисобланади.

Компания сув тежовчи, механизациялашган технологияларни жорий этиш бўйича дунёда етакчи. Компания сувни насослар орқали чиқаришдан бошлаб, экин илдизига етиб боргунча зарур бўладиган суғориш тизимларининг комплекс ечимлар билан шуғулланади. Унинг маҳсулотларидан юздан зиёд мамлакатлар фойдаланади. 

Ботир Зарипов АҚШга ташрифи чоғида “Valmont Industries Inc.” компаниясида бўлиб, ишлаб чиқариш жараёнлари билан яқиндан танишган, компания мутасаддилари билан ўзаро ҳамкорликни йўлга қўйиш масалаларини кенг муҳокама қилган эди. Шундан келиб чиқиб, мулоқотда амалий ҳамкорликнинг истиқболлари юзасидан фикр алмашилди.

“UHM LANDTECH” корхонаси дунёдаги етакчи қишлоқ хўжалиги, қурилиш ва ўрмон хўжалиги техникаси ишлаб чиқарувчиларидан бири ҳисобланган АҚШнинг “John Deere” компанияси билан ҳам яқин ҳамкорликда қишлоқ хўжалиги соҳасини ривожлантириш, фермер ва кластер хўжаликларини замонавий технологиялар билан таъминлаш, молиявий қўллаб-қувватлаш механизмларини такомиллаштириш билан ҳам шуғулланади. 

Учрашувда таклифлар ўртага ташланиб, амалий ҳамкорликни фаоллаштиришга келишиб олинди.

Зариф Комилов, ЎзА мухбири.