Бугунги кунда қишлоқ хўжалигини ривожлантириш, айниқса, томорқачилик соҳасини янги босқичга олиб чиқиш мамлакат иқтисодиётида муҳим аҳамият касб этмоқда.

Шу мақсадда Ўзбекистон фермерлари кенгаши ҳузуридаги “Томорқачиликни ривожлантириш миллий маркази” МЧЖ томонидан Андижон, Бухоро, Қашқадарё, Навоий, Наманган ва Фарғона вилоятлари туман фермерлари кенгаши раислари учун малака ошириш курслари ташкил этилмоқда.

Ушбу курслар фермерлар фаолиятини тизимли ташкил этиш, замонавий қишлоқ хўжалиги технологияларини жорий қилиш, шунингдек, раҳбар кадрларнинг ҳуқуқий ва бошқарув билимларини мустаҳкамлашга қаратилган. Малака ошириш жараёнида иштирокчилар нафақат назарий билимларга, балки амалий тажрибаларга ҳам эга бўлмоқда.

Курслар давомида қишлоқ хўжалигида жорий этилаётган янгиликлар, инновацион ечимлар, интенсив деҳқончилик усуллари, сув тежамкор технологиялар, юқори ҳосил берадиган уруғ навлари ва кўчатлардан фойдаланиш масалалари атрофлича муҳокама қилинмоқда. Айниқса, томорқалардан самарали фойдаланиш орқали аҳоли бандлигини таъминлаш, даромад манбаларини кўпайтириш ва озиқ-овқат хавфсизлигини мустаҳкамлаш масалаларига алоҳида эътибор қаратилмоқда.

Шунингдек, курслар доирасида фермерлар кенгаши раисларининг ҳуқуқ ва мажбуриятлари, уларнинг маҳаллий ҳокимият органлари, банк муассасалари ва бошқа тегишли ташкилотлар билан ҳамкорлиги масалалари ҳам кенг ёритилмоқда. Амалдаги қонунчилик ҳужжатлари, фермер ва деҳқон хўжаликларини қўллаб-қувватлашга қаратилган давлат дастурлари тўғрисида батафсил маълумотлар берилмоқда.

Малака ошириш курсларининг муҳим жиҳатларидан бири – раҳбарлик ва бошқарув кўникмаларини ривожлантиришдир. Туман фермерлари кенгаши раислари ўз ҳудудидаги фермерлар фаолиятини мувофиқлаштириш, муаммоларни ўз вақтида аниқлаш ва уларга ечим топишда етакчи бўлиши лозим. Шу боис курсларда стратегик режалаштириш, таҳлил қилиш, қарор қабул қилиш ҳамда аҳоли билан мулоқот олиб бориш маданияти бўйича ҳам машғулотлар ўтказилмоқда.

Айниқса, қишлоқ хўжалигида рақамлаштириш жараёнлари, электрон платформалар орқали ҳисоб-китоб юритиш, субсидия ва кредитлардан фойдаланиш тартиблари ҳақида берилган маълумотлар иштирокчилар учун катта аҳамият касб этмоқда. Бу эса ўз навбатида соҳада шаффофликни таъминлаш ва самарадорликни оширишга хизмат қилади.

Курслар давомида ҳудудлар кесимида мавжуд муаммолар, иқлим шароити ва ресурслардан келиб чиққан ҳолда ечимлар ишлаб чиқиш масалалари ҳам муҳокама қилинмоқда. Турли вилоятлардан келган раҳбарлар ўзаро тажриба алмашиб, илғор иш услубларини амалиётга жорий этиш имкониятларини кўриб чиқмоқда.

Хулоса қилиб айтганда, “Томорқачиликни ривожлантириш миллий маркази”да ташкил этилаётган малака ошириш курслари туман фермерлари кенгаши раисларининг билим ва салоҳиятини ошириш, қишлоқ хўжалигида ислоҳотларни самарали амалга ошириш ҳамда томорқачиликни ривожлантириш орқали аҳоли фаровонлигини юксалтиришда муҳим аҳамиятга эга. Бундай ўқув курслари келгусида ҳам тизимли равишда давом эттирилиши ва соҳада барқарор ўсишни таъминлаши шубҳасиз.

Маъруфжон Ўрозов,
Ўзбекистон фермерлари кенгаши ҳузуридаги
Фермер хўжаликларини қўллаб-қувватлаш жамғармаси бош мутахассиси.
ЎзА