Шу кунларда Қишлоқ хўжалиги вазирлиги ва Қишлоқ хўжалиги экинлари навларини синаш маркази ходимларидан иборат ишчи гуруҳ Германия давлатида хизмат сафарида бўлиб турибди.

Делегация аъзолари Германиянинг Гонновер пастки саксониясида жойлашган KWS уруғчилик компанияси ҳамда Юлиус Кюн (JKI) номидаги Федераль илмий ўсимликларни ўрганиш институти тажрибаси билан танишди.  

Ҳозирги кунда KWS уруғчилик компанияси 70 та давлат билан ҳамкорлик қилади. 5 мингдан ортиқ илмий йўналишдаги ходимлар фаолият юритади. Шунингдек, 5 та лаборатория, иссиқхона, уруғликларни қайта ишлаш корхонаси мавжуд бўлиб, компания 10 дан ортиқ илмий-тадқиқот институтлари билан алоқа ўрнатган.  

Юлиус Кюн номидаги Федерал илмий ўсимликларни ўрганиш институтида 600 та илмий-тажриба майдони, 10 та лаборатория ва иссиқхона мавжуд, 1300 нафар ходим фаолият юритади. Бундан ташқари, Германия давлати бўйича 18 та илмий-тадқиқот йўналишдаги институтлар билан ҳамкорлик ўрнатилган.  

KWS уруғчилик компанияси ҳамда Юлиус Кюн номидаги Федераль илмий ўсимликларни ўрганиш институтларида бошоқли дон, дуккакли, озуқа, мева-сабзавот, картошка ва бошқа экинлар бўйича илмий-тажриба ишлари амалга оширилади. Бунда экинларнинг қимматли-хўжалик кўрсаткичлари, синовлари ҳамда лаборатория таҳлиллари ўрганилиб, белгиланган тартибда экинларнинг рўйхатга олиниши йўлга қўйилган.  

Ишчи гуруҳ томонидан ўрганилган Германия тажрибаси келгусида республикамизда соҳани ривожлантиришда татбиқ этилади.

Гулноза Бобоева, ЎзА