Жорий йилнинг 9 февралидан бошлаб қишлоқ хўжалиги ерларини “Э-аукцион” платформаси орқали аукцион савдоларига чиқариш бошланди.

Ер муносабатларида тенглик ва шаффофликни таъминлаш, ерга бўлган ҳуқуқларни ишончли ҳимоя қилиш ва уларни бозор активига айлантириш соҳасида бошланган ислоҳотларни давом эттириш мақсадида 2024 йил 18 январда “Қишлоқ хўжалигига мўлжалланган ер участкаларини ижарага бериш тартибини такомиллаштириш бўйича қўшимча чора-тадбирлар тўғрисида” Президент фармони қабул қилинди.

Фармонга асосан 2024 йилнинг 1 март санасидан қишлоқ хўжалигига мўлжалланган ер участкаларини ижарага беришда очиқ электрон танловларни ўтказиш тартиби бекор қилиниб, ерларни электрон онлайн аукцион савдолари орқали сотиш, ижарага бериш тизими жорий этилди.

Бунда ер участкалари электрон онлайн-аукцион орқали ўттиз йилга ижарага берилади ва бошланғич нарх ернинг норматив қиймати миқдорида белгиланади.

Савдо ғолиби аукцион натижасида тасдиқланган суммани:

– қишлоқ хўжалигига мўлжалланган ер участкаларини ижарага олиш ҳуқуқини сотиб олиш тўловлари уч йил муддатда ҳар ойда тенг улушларда;

– деҳқон хўжалиги юритиш учун ер участкаларини ижарага бериш йўналишида “Темир дафтар”, “Аёллар дафтари” ва “Ёшлар дафтари”да рўйхатда турган фуқароларга беш йил муддатга тенг улушларда фоизсиз бўлиб-бўлиб тўлаш ҳуқуқи берилади.

Айни пайтда 28 та ер участкалари “Э-аукцион” электрон савдо платформасига ижарага бериш учун чиқарилган бўлиб, исталган шахс уларни сотиб олиши мумкин.

Ер участкаларини аукцион савдоларига чиқариш давом этмоқда.

Ш.Отабоев
ЎзА