Аграр ва сув хўжалиги тизими мамлакат иқтисодиётининг энг муҳим тармоғи бўлиб, озиқ-овқат хавфсизлигини таъминлашда ҳал қилувчи аҳамиятга эга. Шу боис мазкур соҳаларни қўллаб-қувватлашга алоҳида эътибор қаратилади.

Жумладан, Қишлоқ хўжалиги вазирлигига республика бюджетидан 2024 йилда 1 триллион 716,2 миллиард сўм ажратилган. Шундан вазирлик ва тизимдаги республика бюджетидан молиялаштириладиган 128 та ташкилотнинг 1 триллион 693,1 миллиард сўмлик харажатлар сметаси рўйхатга олинган. 2024 йилда Қишлоқ хўжалиги вазирлиги ривожлантириш дастурлари бўйича ажратилган маблағларнинг йиллик аниқланган режаси 829,7 миллиард сўмни ташкил этиб, шундан, 784,6 миллиард сўм маблағ сарфланган.

Бу ҳақда Олий Мажлис Қонунчилик палатасининг Аграр ва сув хўжалиги масалалари қўмитаси томонидан ўтказилган эшитувда айтиб ўтилди. Унда Сув хўжалиги ҳамда Қишлоқ хўжалиги вазирликларининг “Бюджет маблағларидан фойдаланиш билан боғлиқ мақсадли индикаторлар ижроси, субсидиялардан самарали фойдаланиш ҳамда соҳада жисмоний ва юридик шахсларнинг мурожаатлари билан ишлаш тўғрисида”ги ахборотлари эшитилди.

Мутасаддиларнинг қайд этишича, сув тежовчи технологияларни жорий этиш учун 119,4 млрд. сўм, импорт қилинган наслдор қорамол, қўй ва эчкиларни сотиб олиш харажатларининг бир қисмини қоплаб бериш учун 58,3 млрд. сўм субсидиялар ажратилган. Шунингдек, 2025 йилнинг ҳисобот даврида Қишлоқ хўжалиги вазирлиги ва унинг тизимидаги республика бюджетидан молиялаштириладиган ташкилотлар учун 1 798,9 млрд. сўм маблағ ажратилган бўлиб, 2025 йилнинг 1-чорагида назарда тутилган режа 76,5 фоизга ўзлаштирилган.

Сув хўжалиги вазирлиги ахборотида келтирилганидек, вазирликка ривожлантириш дастури ва мақсадли индикаторлар учун 2024 йилда 10 440,1 млрд. сўм маблағ ажратилган. Ушбу маблағлар пахта хомашёсини етиштирувчилар томонидан томчилатиб ва дискрет суғориш тизимини жорий этиш, сув сарфини камайтириш, насос станциялари орқали суғориладиган ер майдонларини кафолатли сув билан таъминлаш, объектларни лойиҳалаштириш, ирригация тизими ва суғориш тармоқларида сувнинг йўқолишини камайтириш, сув иншоотларининг техник ҳолатини яхшилаш ҳамда суғориладиган ер майдонларини кафолатли сув билан таъминлаш учун йўналтирилган.

Томчилатиб ва ёмғирлатиб суғориш технологияларини жорий қилганларга субсидиялар ажратиб берилаётгани айтиб ўтилди. Хусусан, сувни тежайдиган технологиялар жорий қилинган майдонларга сув ўлчаш ускуналари ўрнатилганда сув солиғидан 50 фоиз имтиёз қўлланилмоқда. Натижада пахта майдонларида жорий қилинган томчилатиб ва дискрет суғориш технологиялари учун қишлоқ хўжалиги корхоналарига 2019-2024 йилларда 1 триллион 366 миллион сўм ажратилган.

Йиғилишда қайд этилганидек, жорий йилнинг июнь ойигача Қишлоқ хўжалиги вазирлигига тўғридан-тўғри ва “edo.ijro.uz (https://edo.ijro.uz/)” электрон тизими орқали 816 та мурожаат келиб тушган. Сув хўжалиги вазирлигига эса 2025 йилнинг 5 ойида 1 минг 562 та жисмоний ва юридик шахсларнинг мурожаатлари келиб тушган. Мазкур мурожаатларнинг аксарияти ўз ечимини топган.

Муҳтарама Комилова,

ЎзА