Президентимиз куни кеча Сирдарё вилояти Сайхунобод туманида бўлганида масъулларга бажарилиши зарур бўлган топшириқларни белгилаб берди.

Айни кунларда ушбу вазифалар ижросини таъминлаш мақсадида ҳудудларда кенг қамровли жараёнлар бошлаб юборилди.

Тошкент вилояти Янгийўл  туманидаги Қирсадақ маҳалласини туманда намунали маҳаллага айлантириш, бу ерда ишсизликни бартараф этиш, маҳалла драйверини  яратиш, аҳоли даромад манбаларини ошириш мақсадида Ўзбекистон Республикаси Сенати раиси Т.Норбаева ва Президент маслаҳатчиси М.Комилов ушбу маҳаллага ташриф буюрди.  

Дастлаб умумхалқ ҳашари муносабати билан ҳуддуддаги таълим муассасасида “Яшил макон” лойиҳаси  доирасида дарахт ниҳолларини экиш ишлари олиб борилди. Унда Республика вазирлик ва идораларнинг масъул раҳбарлари, Янгийўл тумани сектор раҳбарлари ва фахрий нуронийлар, оқила аёллар, отинойилар ҳам иштирок этди.  

Ташкил этилган суҳбатда банд бўлмаган аҳолини касбга ўқитиш, ишга жойлаштириш, тадбиркорликка жалб этиш масалалари устувор йўналиш этиб белгиланди.  

Аҳолиси 3 минг нафардан зиёдни ташкил этадиган Қирсадақ маҳалласи намунавий иш ташкил этиш учун танлаб олинган. Эндиликда махсус тузилган Республика ишчи гуруҳи аъзолари уйма-уй юриб, хатлов ўтказган ҳолда маҳалла аҳолисининг ҳар бири билан шуғулланиши мумкин бўлган фаолият турларини аниқлайди ҳамда унинг натижаларидан келиб чиқиб, маҳаллани ривожлантириш режасини ишлаб чиқади. Шу билан бирга, ушбу жараёнда ижтимоий ҳимояга, тиббий, психологик ёрдамга муҳтож фуқароларга  кўмак бериш чоралари кўрилади.

Берилган топшириқлар ижросини таъминлаш мақсадида  шу куннинг ўзида маҳаллада хатлов ишлари бошланди.

А. Мусаев, ЎзА мухбири