Qirg‘iziston Konstitutsiyasi qirg‘iz tilida yoziladi. Bu haqda Konstitutsiya kengashi a’zosi, Qirg‘iziston Respublikasining Buyuk Britaniya Birlashgan qirolligidagi elchisi Edil Baysalov Bishkekda jurnalistlar uchun uyushtirilgan matbuot anjumanida ma’lum qildi.

Konstitutsiya kengashi 2010 yildan buyon amal qilib kelinayotgan Konstitutsiya asosida faoliyat yuritmoqda. “Biz uchun, ayniqsa e’tibor qiladigan jihati, Asosiy qonun ona tilimizda, ya’ni qirg‘iz tilida yozilishidir. Bu juda muhim. Chunki avvalgi Konstitutsiya rus tilida yozilib qirg‘iz tiliga tarjima qilingan edi. Shu bois turlicha talqinlar, mos kelmaslik holatlari yuzaga kelgandi. Endi har bir so‘z sinchiklab muhokama qilinadi va tanlanadi. Bu katta siljish», – dedi Baysalov.

Baysalovning ta’kidlashicha, qanday Konstitutsiya bo‘yicha yashashni xalqning yakuniy qarori hal qiladi.

O‘zA