Qirg‘iziston parlamenti – Jogorku Keneshi majlisida deputat Gulya Kojokulova Bishkek shahridagi tarixiy-madaniy ob’ektlarning buzilishi yuzasidan mas’ullarni javobgarlikka tortish masalasini ko‘tardi.

– Bu holat uchun kim javob beradi? –dedi u. – Kontitutsiyamizda tarixiy yodgorliklarni yo‘q qilish uchun jinoiy javobgarlik belgilangan.

Ta’kidlanishicha, Qirg‘iziston madaniyat vaziri Mirbek Mambetaliyev davlatga yetkazilgan zarar hozirda tahlil qilinayotganini ma’lum qilgan. Uning aytishicha, mazkur holat bo‘yicha huquqni muhofaza qiluvchi organlar ish olib bormoqda.

Eslatib o‘tamiz, avvalroq Bishkekda 1956 yilda qurilgan tarixiy favvora hamda madaniyat yodgorliklari reyestriga kiritilgan “Xalqlar do‘stligi” mozaika binosi buzib tashlangan edi.

D.Hakimov, O‘zA