Қазақстанда 78 қылмыстық-атқару жүйесі мекемесі жұмыс істейді. Соңғы 4 жылда түрмедегі адамдардың саны 7 мыңға жуық өскен.

KAZINFORM мәліметінше, бұл туралы ҚР ІІМ Қылмыстық-атқару жүйесі комитетінің төрағасы Теңізжан Жәнібеков айтты.

«Соңғы 4 жылда түрмедегі адамдардың саны 7 мыңға жуық өсті. Бұл бөтеннің мүлкін ұрлау, отбасылық-тұрмыстық зорлық-зомбылық, мал ұрлығы және жол-көлік оқиғалары саласындағы заңнаманың қатаңдатылуына байланысты», - деген комитет төрағасы Орталық коммуникациялар қызметінде өткен баспасөз мәслихатында.

Оның айтуынша, Қазақстанда 78 қылмыстық-атқару жүйесі мекемесінде 37 мыңнан астам сотталған жазасын өтеп жатыр. Оның ішінде 3 мыңға жуығы әйелдер және 50-ден астам кәмелетке толмағандар бар. Атап өтерлігі, 37 мың тұтқынның 93 пайызы ауыр және аса ауыр қылмыстар үшін сотталған адамдар. Бұл ретте сотталғандардың 45 пайызы бұрын қасақана қылмыс жасағаны үшін сотталған адамдар. 

«ҚАЖК қоғамның ең күрделі санатымен жұмыс істеп жатыр. Осыған қарамастан, жалпы мекемелерде жедел жағдай тұрақты және бақылауда. Қамаудағы әр адаммен психологтар мен мекемедегі әртүрлі қызметтер кешенді жұмыс жүргізеді», - деген Т.Жәнібеков.