Қазақстанның Қарағанды облысында жоспарлы оқу-жаттығу ұшулары барысында Су-30СМ жойғыш ұшағы апатқа ұшырады. Бұл туралы Қорғаныс министрлігінің баспасөз қызметі хабарлаған.

KAZINFORM дерегінше, оқиға 25 ақпан күні жоспарлы оқу-жаттығу ұшулары барысында болған.

— Ұшақ экипажы дер кезінде катапульт жасады. Ұшқыштар дін аман, олардың өмірі мен денсаулығына қауіп жоқ. Қазіргі уақытта медициналық мамандардың бақылауында, — делінген хабарламада.

Ұшақ құлаған аумақ қоршауға алынған. Тұрғындар мен инфрақұрылым нысандарына еш қауіп жоқ.

Оқиғаның себептері мен мән-жайын анықтау үшін Қазақстан Республикасы Қорғаныс министрлігінің арнайы комиссиясы құрылды. Комиссияны ұшу қауіпсіздігі жөніндегі департамент басқарады. Құрамына авиациялық қызметтің арнайы мамандары кірді, делінген хабарда.

Тергеу қорытындысы бойынша құқықтық баға беріліп, процессуалдық шешім қабылданатыны айтылған.